Nduyo 145 - Bhaibheri Rakachena muChindau

¹ Ndinozokutunhumadza, Mwari wangu naMambo wangu; ndinozokudza zina rako mhera nariini.

² Ndinozokukudza mazuva eshe; ndinozokudza zina rako mhera nariini.

³ Mambo Mwari mukuru, unosisira kuti akudzwe kakurutu; ukuru hwake ahungatsvakwi.

⁴ Mubarirwana umwe unozotunhumadza mishando yako kunomubarirwana umweni, nokuteketesa mishando yako inesimba.

⁵ Ndinozorangarira ngokuremeredzwa kwako kunoumambo hunouthende, nemishando yako inoshamisa.

⁶ Vanhu vanozoereketa ngesimba ngemishando yako inotyisa, neni ndinozoteketesa ukuru hwako.

⁷ Vanozoereketa ngembiri yokuwanda kwokunaka kwako kukuru, vanozoemba kudaidzira ngokururama kwako.

⁸ Mambo Mwari unenyasha, wakazara ngokukungurira; unononoka kunyangadzwa unenyasha huru dzinorudo.

⁹ Mambo Mwari wakanaka kwevari veshe; nyasha dzake dzinogara padera pavo veshe vaakasika.

¹⁰ Mishando yako yeshe inozobonga kweuri, A Mambo Mwari, nevakacheneswa vako vanozokukudza.

¹¹ Vanozoereketa ngouthende hwoumambo hwako, nokuereketa ngesimba rako,

¹² kuziisa kuvanhu veshe mishando yako inesimba, nouthende hwoukuru hwoumambo hwako.

¹³ Umambo hwako umambo hwemhera nariini, nokutonga kwako kuchagara kumibarirwana yeshe. Mambo Mwari unogondeka mumazwi ake eshe, nenyasha mumishando yake yeshe.

¹⁴ Mambo Mwari unotsimisa veshe vanowa, unomirudza avo veshe vanokotamira pashi.

¹⁵ Madziso eveshe anoringira kweuri, newe unovapa kudya kwavo ngenguva kwayo.

¹⁶ Unobeura nyara yako, unogutisa chidisiso chechiro cheshe chinorarama.

¹⁷ Mambo Mwari wakarurama munjira dzake dzeshe, unenyasha mumishando yake yeshe.

¹⁸ Mambo Mwari uri pasinde pavo veshe vanodaidza kwaari, kwevari veshe vanodaidza kwaari mugwinyiso.

¹⁹ Unogutisa chidisiso cheweshe unomutya; unozwazve kuchema kwavo nokuvaponesa.

²⁰ Mambo Mwari unongwarira veshe avo vanomuda, asi unozoparadza veshe vakashata.

²¹ Muromo wangu unozoereketa kukudzwa kwaMambo Mwari, nenyama yeshe inozokudza zina rake rakachena mhera nariini.