Nduyo 143 - Bhaibheri Rakachena muChindau

¹ Izwai mukumbiro wangu, A Mambo Mwari; purutana kupota kwangu mukugondeka kwako; ndipingure mukururama kwako.

² Usapotera mukutongwa nomuranda wako, ngokuti mukuona kwako apana naumwe unopona ungapembedzwa.

³ Ngokuti gaa randirumbirira, raparadza ndaramo yangu pashi pamavhu, randiita kuti ndigare muugaro hwakasvipa kudai ndivo vakafa karetu.

⁴ Ndizvo mweya wangu unodzerera mukati mwangu; mwoyo wangu mukati mwangu unekutyiswa kakurutu.

⁵ Ndinokarakadza mazuva ekaretu, ndinorangarira ngemishando yako yeshe, ndinopinimidza ngomushando wenyara dzako.

⁶ Ndinotambanudzira nyara dzangu kwouri; mweya wangu unoomerwa ngokuda iwewe kudai ngemavhu akaoma. Selah.

⁷ Kasira kundipingura, A Mambo Mwari; Mweya wangu unodzerera. Usafisha hope yako kubva kwendiri, kuti ndisadai ngaavo vanonzvaira muhunza.

⁸ Ita kuti ndizwe nyasha dzako dzinorudo mumangwanani, ngokuti ndinogonda mwouri. Ndidzidzise kuti ndizie njira yendingahamba ndiyo, ngokuti ndinomirudzira mweya wangu kwouri.

⁹ Ndinunure, A Mambo Mwari, kubva kumagaa angu; ndinotizira kwouri kuti ndidzifishe.

¹⁰ Ndidzidzise kuita kuda kwako, ngokuti iwewe ndiwe Mwari wangu. Mweya wako wakanaka unditungamirire munjira yakarurama.

¹¹ Ngendaa yezina rako, A Mambo Mwari, ponesa ndaramo yangu. Mukururama kwako budisa mweya wangu kubva mukutambudzika.

¹² Munyasha dzako dzinorudo uraya magaa angu, paradza veshe vanotambudza mweya wangu, ngokuti ndiri muranda wako. Nduyo yaDhavhidha.