Nduyo 141 - Bhaibheri Rakachena muChindau

¹ Mambo Mwari, ndinodaidza kweuri; kasira kuuya kwendiri; purutana izwi rangu, apo pendinodaidza kweuri.

² Mukumbiro wangu ngauzwike pamberi pako kudai ngomutombo wokupisha. Kumirudzwa kwenyara dzangu ngakudai ngomubairo wemadeekoni.

³ Emesa murindi padera pemiromo yangu, A Mambo Mwari; ngwarira ruvhi rwemiromo yangu.

⁴ Usaungamisira mwoyo wangu kunechiro chakashata, ndisabatana nevanhu vanoshanda zvakashata; ndisadya zvakanaka zvavo.

⁵ Wakarurama ngaandiorore, wakagondeka ngaandipange. Usatenda kuti ndidzodzwe soro rangu ngemafuta ewakashata, ngokuti mukumbiro wangu unoangira kurwisana nezviito zvavo zvakashata.

⁶ Naapo pevanozopirwa kuneavo vanozovatonga, zvino vanozozia kuti mazwi angu akanaka.

⁷ Kudai ngebuwe rinoputswa nokupararira padera pemavhu, ndizvo magodo avo anozotatanikira pamuromo weiba.

⁸ Asi madziso angu ari kwouri, A Mwari, Mambo Mwari wangu; mweuri ndinotsvaka pokuhwara; usandisiya ndisikazi kuvhikirwa.

⁹ Ndingwarire kubva kumurau wevakanditeya ndiwo, nokubva kumikuni yevashandi vezvakashata.

¹⁰ Vakashata ngavawire mumambure avo, apo inini ndega ndichapokonyoka. Nduyo yaDhavhidha ari mubako.