Nduyo 139 - Bhaibheri Rakachena muChindau

¹ A Mambo Mwari, iwewe wakandiedza, ukandizia.

² Unozia kugara kwangu nokumiruka kwangu; iwewe unozwisisa mukarakadzo wangu uri kuretu.

³ Unoringisisa kuhamba kwangu nokuata kwangu, unozia njira dzangu dzeshe.

⁴ Kunyazwi izwi risati raapo parurumi rwangu, A Mambo Mwari, unorizia kwakaperera.

⁵ Wakanditsiira mberi nesure, ukaisa nyara yako padera pangu.

⁶ Kuzia kwakadai kunondishamisa kakurutu; kwakaturama mudenga, andingakuhaniri.

⁷ Ndinozoenda kuri kubva kumweya wako? Nokuti ndingatizira kuri kubva mukuona kwako?

⁸ Kudai ndechikwira mudenga, iwewe urimwo; kudai ndechichinga manhi angu muSheori, ringira, iwewe urimwo.

⁹ Kudai ndechimbururuka ngemaphaphiro emambakwedza, ndikagara kumigano yoruandhle,

¹⁰ kunyazwi apo nyara yako inozonditungamirira, nenyara yako yokumudyo inozondibata yaamho.

¹¹ Kudai ndechiti, “Ngegwinyiso chidima chinozondimbonya, nokujeka kwakanditendenedza kunozoita usiku,”

¹² kunyazwi nechidima achingadzifishi kubva kwouri; usiku hunojeka kudai ngemasikati, chidima nokujeka zvakatodzana kwouri.

¹³ Ngokuti ndiwe wakaita zveshe zviri mukati mwangu; wakandifukidza ndiri mundani yamai angu.

¹⁴ Ndinokukudza, ngokuti ndakasikwa ngenjira inotyisa neinoshamisa. Mishando yako inoshamisa; izvo mweya wangu unonasa kuzia yaamho.

¹⁵ Chiemo changu achizi kufishika kwouri, apo pendairurwa pakasitika, ndakarurwa ngenjira inoshamisa kuudzamu wepashi penyika.

¹⁶ Madziso ako akaona muiri wangu usati wanasa kuumbwa. Mubhuku rako akanyorwa eshe mazuva endakaemeserwa apo kusati kwaapo narimwe rawo.

¹⁷ A, kuremanyi kwemikarakadzo yako kwendiri, A Mwari! A, kuwandanyi kwayo!

¹⁸ Ndinoedza kuierenga, yakapinda jecha ngokuwanda; ndechimuka, ndindori newe.

¹⁹ A kudai ungauraya vakashata, A Mwari, nokuti avo vanenyota yokuparadza ngazi vabve kwendiri,

²⁰ avo vanoereketa zvakashata ndiwe, nemagaa ako anoshandisa zina rako pasina shwiro.

²¹ Andivazondi avo vanokuzonda here, A Mambo Mwari? Neni andinyangadzwi here ngaavo vanokumukira?

²² Ndinovazonda ngezondo gurutu; ndinovaerenga kuti magaa angu.

²³ Nditsvakisisei, A Mwari, uzie mwoyo wangu; ndiedze, uzie mikarakadzo yangu.

²⁴ Wona kuti iripo here njira yakashata mukati mwangu, undikweere munjira yemhera nariini. KuneMutungamiriri woKuemba. Nduyo yaDhavhidha.