Nduyo 138 - Bhaibheri Rakachena muChindau

¹ Ndinozokubonga, A Mambo Mwari, ngomwoyo wangu weshe; ndinozoemba kukukudza pamberi pezvimwari.

² Ndinozodira ndakaringira kutemperi rako rakachena, nokubonga zina rako ngendaa yenyasha dzako dzinorudo negwinyiso rako; ngokuti wakakurisa zina rako neizwi rako padera pezviro zveshe.

³ Pazuva rendakakudaidza, wakandipingura; wakatutsira simba rangu mumweya mwangu.

⁴ Madzimambo eshe enyika anozokukudza, A Mambo Mwari, ngokuti vakazwa mazwi omuromo wako.

⁵ Vanozoemba ngenjira dzaMambo Mwari, ngokuti uthende hwaMambo Mwari ukuru.

⁶ Ngokuti kunyazwi Mambo Mwari wakaturama, unokarakadza ngevari pashi; asi unomuzia unodzikudza ari kuretu.

⁷ Kunyazwi ndechihamba mukati mwedambudziko, iwewe unondimusidzira; unotambanudza nyara yako kurwa noushungu hwemagaa angu, nenyara yako yokumudyo inondiponesa.

⁸ Mambo Mwari unozopereresa izvo zvaanoda kwendiri; nyasha dzako dzinorudo, A Mambo Mwari, dzinogara mhera nariini. Usarekera mishando yenyara dzako. KuneMutungamiriri woKuemba. Nduyo yaDhavhidha.