Nduyo 135 - Bhaibheri Rakachena muChindau

Nduyo yoKukudza

¹ Kudzai Mambo Mwari! Kudzai zina raMambo Mwari; mukudzei, imwimwi varanda vaMambo Mwari,

² imwimwi munoema mumhatso yaMambo Mwari, mumaruwanze emhatso yaMwari wedu.

³ Kudzai Mambo Mwari, ngokuti Mambo Mwari wakanaka; embai kukudza zina rake, ngokuti zvinodakadza.

⁴ Ngokuti Mambo Mwari wadzitsanangurira Jakobe kuita wake, naIsuraeri kuita pfuma yake.

⁵ Ngokuti ndinozia kuti Mambo Mwari mukuru; Mambo Mwari wedu uri mukuru kunezvimwari zveshe.

⁶ Zveshe zvaanodakarira Mambo Mwari, unozviita, mudenga nomunyika, nomuruandhle nomuudzamu hweshe.

⁷ Ndiye unopwititisa makore kubva kumigano yenyika; unoita kuti mvura inaye nemheni; unobudisa dutu kubva muugaro hwoupfumi hwake.

⁸ Ndiye wakauraya matangwe eEgipite, eshe evanhu neemhuka.

⁹ Wakatuma zvioniso nemishamiso pakati pako, iwewe Egipite, padera paFaro nepadera pevaranda vake veshe.

¹⁰ Wakauraya madzinza mazhinji, akauraya madzimambo anesimba,

¹¹ Sihoni mambo wevaAmori, naOgi mambo weBhashani, noumambo hweshe hweKhenani.

¹² Wakapa nyika yavo kuita nhaka, nhaka kunaIsuraeri vanhu vake.

¹³ Zina rako, A Mambo Mwari, rinogara mhera nariini; rinokarakadzwa, A Mambo Mwari, kumibarirwana yeshe.

¹⁴ Ngokuti Mambo Mwari unozopembedza vanhu vake, nokukungurira varanda vake.

¹⁵ Miedzaniso yemadzinza ngeyesirivha neyomukore, mushando wenyara dzevanhu.

¹⁶ Inemiromo, asi aiereketi; inemadziso, asi aioni;

¹⁷ inenzee, asi aizwi; nayo aifemi mumiromo yayo.

¹⁸ Avo vanoinasira neavo veshe vanoigonda vanozotodzana nayo.

¹⁹ A mhatso yaIsuraeri, mukudzenyi Mambo Mwari! A mhatso yaAroni, mukudzenyi Mambo Mwari!

²⁰ A mhatso yaRevhi, mukudzenyi Mambo Mwari! Imwimwi munomutya Mambo Mwari, mukudzenyi Mambo Mwari!

²¹ Ngaakudzwe Mambo Mwari muZioni, uwo unogara muJerusarema. Mukudzenyi Mambo Mwari!