Nduyo 132 - Bhaibheri Rakachena muChindau

¹ Mambo Mwari, karakadzai Dhavhidha mumadambudziko ake eshe;

² njira yaakapika ndiyo kunaMambo Mwari, nokugondisa kwaakaita kunoUne-simba-waJakobe echiti,

³ “Andizopoteri muugaro hwemhatso yangu, nokuti kukwira pamubhedhi wangu;

⁴ andizotswatiri madziso angu kuti ndiate, nokuti tsiyo dzangu adzizokutsiri,

⁵ metsa ndatsvakira Mambo Mwari ugaro, ndau yokugara youwoUne-simba-waJakobe.”

⁶ Ringira, takazvizwira muEfratha; takazvionera mushango reJaari.

⁷ “Ngatipotere mundau yougaro hwake; ngatidire pachitambariro chetsoka dzake.”

⁸ Miruka, A Mambo Mwari, upotere muugaro hwako hwokuzorora, iwewe nebhokisi rechitenderano resimba rako.

⁹ Vapristi vako ngavafukidzwe ngokururama, nevakacheneswa vako ngavadaidzire ngokudakara.

¹⁰ Ngendaa yomuranda wako Dhavhidha, usafuratira hope yowakadzodzwa wako.

¹¹ Mambo Mwari wakapika kunaDhavhidha mhiko yegwinyiso, aachazokunukuki kubva kweiri: “Umwe wevakororo vendani yako ndinozomugadzika padendemaro rako.

¹² Kudai vakororo vako vechizongwarira chitenderano changu nemitemo yangu yendinozovadzidzisa, vakororo vavowo vanozogara padendemaro rako mhera nariini.”

¹³ Ngokuti Mambo Mwari wakatsanangura Zioni; wakaridisisa kuita ugaro hwake:

¹⁴ “Uhwu ndihwo ugaro hwangu hwokuzorora mhera nariini; ndinozogara pano ngokuti ndakapada.

¹⁵ Ngegwinyiso ndinozofumisa ngokuwanzisa kudya kwavo; ndinozogutisa varombo varo ngechingwa.

¹⁶ Vapristi varo ndinozovapfekesa ngoruponeso, nevakacheneswa varo vanozodaidzira ngokudakara.

¹⁷ Naapo ndinozomeresa runyanga rwaDhavhidha; ndanasirira wakadzodzwa wangu chibani.

¹⁸ Ndinozofukidza magaa ake ngokutsveruka, asi paari dzungudza rake rinozopenya.” Nduyo yokukwira. Nduyo yaDhavhidha.