Nduyo 119 - Bhaibheri Rakachena muChindau

Mupango waMambo Mwari

¹ Vanomuchena avo vanenjira yakaperera, avo vanohamba mumupango waMambo Mwari.

² Vanomuchena avo vanongwarira uchapupu hwake, avo vanomutsvaka ngomwoyo yavo yeshe,

³ avo vasikaitiwo chiro chisina kururama, asi vanohamba munjira dzake.

⁴ Iwewe wakatipanga mipango yako kuti tiingwarire zvakanaka.

⁵ A, kudai njira dzangu dzatsima mukungwarira zviemeso zvako!

⁶ Zvino andizotsverudzwi, apo ndine madziso angu akaringira mipango yako yeshe.

⁷ Ndinozokukudza ngomwoyo unokururama, apo pendinozodzidza zvitongero zvako zvakarurama.

⁸ Ndinozongwarira zviemeso zvako; A, usandirasha yaamho.

Kupurutana Mupango waMambo Mwari

⁹ Jaha ringangwarira ngenjiranyi njira yaro kuti igare yakasukika? Ngokuingwarira kudai ngezvinoronzwa ngeizwi rako.

¹⁰ Ndinokutsvaka ngomwoyo wangu weshe; usanditendera kuti ndipauke kubva kumipango yako.

¹¹ Ndafisha izwi rako mumwoyo mwangu, kuti ndisakushaishira.

¹² Kudzwai Mambo Mwari; ndidzidzise zviemeso zvako.

¹³ Ngomuromo wangu ndinoteketesa zveshe zvitongero zvomuromo wako.

¹⁴ Ndinodakara munjira yezvapupu zvako, kudai ngezvendinodakara muupfumi hweshe.

¹⁵ Ndinozopinimidza ngemipango yako, madziso angu aringisise njira dzako.

¹⁶ Ndinozodakara muzviemeso zvako; andizoriyarwi izwi rako.

Kudakara Kuri muMupango waMambo Mwari

¹⁷ Itira muranda wako zvakanaka kuti ndipone nokungwarira izwi rako.

¹⁸ Beura madziso angu, kuti ndione zviro zvinoshamisa mumupango wako.

¹⁹ Ndinogara kudai ngomupara munyika; usandifishira mipango yako.

²⁰ Mweya wangu unokakaseka ngokuda zvitongero zvako nguva dzeshe.

²¹ Iwewe unokaraidza vanodzikudza ngechituko, avo vanonzerereka kubva mumipango yako.

²² Dusa kubva kwendiri kutsverudza nokuyeyisa kwavo, ngokuti ndakangwarira zvapupu zvako.

²³ Kunyazwi vatongi vanogara kupangana kurwa neni, muranda wako unozopinimidza ngezviemeso zvako.

²⁴ Zviemeso zvako zviri kudakara kwangu, ndizvo zvinondipanga.

Kudziemesera Kupurutana Mupango waMambo Mwari

²⁵ Mweya wangu unobatirira kubukuta; ndimusirire kudai ngeizwi rako.

²⁶ Apo pendakakuronzera ngenjira dzangu, iwewe wakandipingura; ndidzidzise zviemeso zvako.

²⁷ Ndiite kuti ndizwisise njira yemipango yako, neni ndinozopinimidza ngemishando yako inoshamisa.

²⁸ Mweya wangu unonyunguruka ngokuremerwa; ndigwinyise kudai ngeizwi rako.

²⁹ Bvisa kubva kwendiri njira yemanyepo; undidzidzise mupango wako ngenyasha.

³⁰ Ndatsanangura njira yokugondeka; ndakaemesa zvitongero zvako pamberi pangu.

³¹ Ndinobatirira kuzvapupu zvako, A Mambo Mwari; usanditsverudza.

³² Ndinorumba munjira yemipango yako, ngokuti unokudza kuzwisisa kwangu.

Mukumbiro woKuzwisisa

³³ Ndidzidzise, A Mambo Mwari, njira yezviemeso zvako, neni ndinozoingwarira metsa kumagumo.

³⁴ Ndipe kuzwisisa, kuti ndingwarire mupango wako, ndiungwarire ngomwoyo wangu weshe.

³⁵ Ndiite kuti ndihambe munjira yemipango yako, ngokuti ndinodakara ndiyo.

³⁶ Kunukudzira mwoyo wangu kumitemo yako, haiwa mukuemura.

³⁷ Kunukudzira madziso angu kubva mukuringira zvisina shwiro; ndipe kupona munjira dzako.

³⁸ Gwinyisa chigondiso chako kumuranda wako, uwo unokutya.

³⁹ Kunukudzira kutsverudzwa kwangu kwendinotya, ngokuti zvitongero zvako zvakanaka.

⁴⁰ Ringira, ndinodisisa mipango yako; mukururama kwako ndipe kupona.

Kugonda Mupango waMambo Mwari

⁴¹ Nyasha dzako dzinorudo ngadziuye kwendiri, A Mambo Mwari, ruponeso rwako kudai ngechigondiso chako.

⁴² Zvino ndinozoona mupinguro kwevari vanondituka, ngokuti ndinogonda izwi rako.

⁴³ Usadusa reshe izwi regwinyiso kubva mumuromo wangu, ngokuti kugonda kwangu kuri muzvitongero zvako.

⁴⁴ Ndinozogara ndechingwarira mupango wako mhera nariini nariini.

⁴⁵ Ndinozohamba ndakasunhurika, ngokuti ndakatsvaka mipango yako.

⁴⁶ Ndinozoereketazve ngezvapupu zvako pamberi pemadzimambo, andizotsveruki.

⁴⁷ Ndinoona kudakara kwangu mumipango yako, ngokuti ndinoida.

⁴⁸ Ndinoremeredza mipango yako iyo yendinoda; ndinozokarakadza ngezviemeso zvako.

Kugonda muMupango waMambo Mwari

⁴⁹ Karakadza izwi rako kunomuranda wako, umwo mwewakaita kuti ndigonde.

⁵⁰ Uku ndikwo kuembedzerwa kwangu mukutambudzika kwangu, chigondiso chako chinondipa kupona.

⁵¹ Vanodzikudza vanondisheka kakurutu, asi andipauki kubva kumupango wako.

⁵² Naapo ndechipinimidza ngezvitongero zvako kubvira karetu, ndinozwa kuembedzerwa, A Mambo Mwari.

⁵³ Ushungu hunobaka hwandibata ngendaa yevakashata, avo vanoramba mupango wako.

⁵⁴ Zviemeso zvako zvaiya nduyo dzangu kweshe kwendinoita ugaro hwangu.

⁵⁵ Ndinokarakadza zina rako muusiku, A Mambo Mwari, nokungwarira mupango wako.

⁵⁶ Ichi chifumiso chawira padera pangu, ngokuti ndangwarira mipango yako.

Kugara Wakanamira paMupango waMambo Mwari

⁵⁷ Mambo Mwari uri chikoaniswa changu; ndinozogondisa kungwarira mazwi ako.

⁵⁸ Ndinokumbira nyasha dzako ngomwoyo wangu weshe; ndiitire nyasha, kudai ngechigondiso chako.

⁵⁹ Naapo ndechipinimidza njira dzako, ndinokunukudzira tsoka dzangu kuzvapupu zvako.

⁶⁰ Ndinokasira, andinonoki kungwarira mipango yako.

⁶¹ Kunyazwi mapote evakashata akandipombera; andiriyarwi mipango yako.

⁶² Ndinomuka pakati pousiku kukukudza, ngendaa yezvitongero zvako zvakarurama.

⁶³ Ndiri shamwari yeavo veshe vanokutya, yeavo vanongwarira mipango yako.

⁶⁴ Nyika yakazara ngenyasha dzako dzinorudo, A Mambo Mwari; ndidzidzise zviemeso zvako.

Mutengo Mukuru woMupango waMambo Mwari

⁶⁵ Wakaita zvakanaka kunomuranda wako, A Mambo Mwari, kudai ngeizwi rako.

⁶⁶ Ndidzidzise kutonga kwakanaka nokuzia, ngokuti ndinogonda mipango yako.

⁶⁷ Ndisati ndatambudzwa ndakapauka, asi zvino ndinongwarira izwi rako.

⁶⁸ Iwewe wakanaka, unoita zvakanaka; ndidzidzise zviemeso zvako.

⁶⁹ Vanodzikudza vakandirongera gumbu, asi ngomwoyo wangu weshe ndinongwarira mipango yako.

⁷⁰ Mwoyo yavo yakakora inemafuta, asi ndinodakara ngomupango wako.

⁷¹ Zvakandinakira kuti ndakatambudzwa, kuitira kuti ndidzidze zviemeso zvako.

⁷² Mupango womuromo wako wakandinakira kupinda zvigurwa zvomukore nesirivha makumi emazana.

Kutonga Kwakanaka kwoMupango waMambo Mwari

⁷³ Nyara dzako dzakandisika, dzikandiumba; ndipe kuzwisisa, kuti ndidzidze mipango yako.

⁷⁴ Avo vanokutya vanozondiona, vadakare, ngokuti ndaiya ndagonda izwi rako.

⁷⁵ Ndinozia, A Mambo Mwari, kuti kutonga kwako kwakarurama, nokuti muugondeki iwewe wakanditambudza.

⁷⁶ Nyasha dzako dzinorudo ngadziite kuembedzerwa kwangu, kudai ngechigondiso chako kumuranda wako.

⁷⁷ Nyasha dzako dzinokungurira ngadziuye kwendiri, kuti ndirarame; ngokuti mupango wako ndikwo kudakara kwangu.

⁷⁸ Vanodzikudza ngavatsverudzwe, ngokuti vakandipaukisa pasina ndaa; asi inini ndinozopinimidza ngemipango yako.

⁷⁹ Avo vanokutya ngavakunukukire kwendiri, kuitira kuti vazie zvapupu zvako.

⁸⁰ Mwoyo wangu ngauperere muzviemeso zvako, kuitira kuti ndisatsverudzwa.

Mukumbiro woKuda Kununurwa

⁸¹ Mweya wangu unodemerera ruponeso rwako; ndinogonda muizwi rako.

⁸² Madziso angu odzerera ngokugarira izwi rako, ndechiti, “Unozondiembedzera riini?”

⁸³ Ngokuti ndinodai ngembudu yedoo iri pachiushi, asi andiriyarwi zviemeso zvako.

⁸⁴ Muranda wako unoshingirira metsa riini? Unozovatonga riini avo vanonditambudza?

⁸⁵ Vanodzikudza vanditsira hunza, avo vasikangwariri mupango wako.

⁸⁶ Mipango yako yeshe inogondeka; vanonditambudza pasina ndaa; ndidetsere iwewe!

⁸⁷ Vakatodo kundiuraya munyika; asi andizi kurekera mipango yako.

⁸⁸ Ndiponese kudai ngouwandu hwenyasha dzako dzinorudo, kuitira kuti ndingwarire uchapupu hwomuromo wako.

Kugonda muMupango waMambo Mwari

⁸⁹ Izwi rako rakatsima mudenga mhera nariini, A Mambo Mwari.

⁹⁰ Ugondeki hwako hunogara kumibarirwana yeshe; iwewe wakatsimisa nyika, nayo inogara iripo.

⁹¹ Ngokuemesa kwako zvinogara nanyamashi, ngokuti zviro zveshe varanda vako.

⁹² Kudai mupango wako usaiita kudakara kwangu, ndaizodai ndakaparara mukutambudzika kwangu.

⁹³ Andimbozokanganwi mipango yako, ngokuti kubudikidza ndiyo wakandiponesa.

⁹⁴ Ndiri wako, ndiponese; ngokuti ndatsvaka mipango yako.

⁹⁵ Vakashata vanondihwarira kuti vandiuraye, asi ndinopinimidza ngezvapupu zvako.

⁹⁶ Ndakaona magumo okuperera kweshe, asi mupango wako wakapamhama kakurutu.

Kuda Mupango waMambo Mwari

⁹⁷ A, kudanyi kwendinoita mupango wako! Uri mumupinimidzo wangu zuva reshe.

⁹⁸ Mipango yako inondiita wakangwara kupinda magaa angu, ngokuti ineni nguva dzeshe.

⁹⁹ Ndinokuzwisisa kunopinda vadzidzisi vangu veshe, ngokuti zvapupu zvako ndikwo kupinimidza kwangu.

¹⁰⁰ Ndinozwisisa kupinda vasharuka, ngokuti ndinongwarira mipango yako.

¹⁰¹ Ndarambidza tsoka dzangu kuhamba ngenjira dzeshe dzakashata, kuitira kuti ndingwarire izwi rako.

¹⁰² Andipauki kubva kuzvitongero zvako, ngokuti iwewe wandidzidzisa.

¹⁰³ Kutapiranyi kunoita mazwi ako kumaraira, anotapira kupinda uchi mukanwa mwangu!

¹⁰⁴ Ndinoona kuzwisisa kubudikidza ngemipango yako; ndizvo ndinozonda njira dzeshe dzemagumbu.

Kujeka Kunobva muMupango waMambo Mwari

¹⁰⁵ Izwi rako ndirwo rumvenu rwetsoka dzangu, nokujeka kwenjira yangu.

¹⁰⁶ Ndapika mhiko, ndikaigwinyisa, kuti ndinozongwarira zvitongero zvako zvakarurama.

¹⁰⁷ Ndinotambudzika kakurutu; ndiponese, A Mambo Mwari, kudai ngokuronza kweizwi rako.

¹⁰⁸ Ashira mudiro wangu wokukudza, A Mambo Mwari, undidzidzise zvitongero zvako.

¹⁰⁹ Mweya wangu unogara uri munyara yangu; asi andikanganwi mupango wako.

¹¹⁰ Vakashata vanditeya ngomurau, asi andipauki kubva kumipango yako.

¹¹¹ Zvapupu zvako inhaka yangu mhera nariini; ngokuti zviri kudakara kwomwoyo wangu.

¹¹² Ndakaungamisira mwoyo wangu kuti uite zviemeso zvako mhera nariini, metsa kumagumo.

Kungwaririka muMupango waMambo Mwari

¹¹³ Ndinozonda vanemipinimidzo miiri, asi ndinoda mupango wako.

¹¹⁴ Iwewe uri bako rangu nechihlangu changu; ndinogonda muizwi rako.

¹¹⁵ Ibvai kwendiri, imwimwi vaiti vezvakashata, kuti ndingwarire mipango yaMwari wangu.

¹¹⁶ Nditsimise kudai ngokuronza kweizwi rako, kuti ndirarame; usatenda kuti nditsveruke ngegonda rangu.

¹¹⁷ Ndibate, kuti ndingwaririke, ndigare ndechiremeredza zviemeso zvako.

¹¹⁸ Iwewe unoramba avo veshe vanopauka kubva kuzviemeso zvako; ngokuti kuchengedzera kwavo akuna shwiro.

¹¹⁹ Unovarasha veshe vakashata vomunyika kudai ngemahundi; ndizvo ndinoda zvapupu zvako.

¹²⁰ Muiri wangu unohuta ngokukutya; ndinotya zvitongero zvako.

Kupurutana kuMupango waMambo Mwari

¹²¹ Ndaita kutonga kwakanaka nokururama; usandisiya kunevatambudzi vangu.

¹²² Ita chigondiso kunemuranda wako chokundiitira zvakanaka; usatenda kuti vasikatendi Mwari vanditambudze.

¹²³ Madziso angu anodzerera ngokutsvaka ruponeso rwako, nokuzadzisika kwechigondiso chako chakarurama.

¹²⁴ Ita kunomuranda wako kudai ngouwandu hwenyasha dzako dzinorudo, undidzidzise zviemeso zvako.

¹²⁵ Ndiri muranda wako; ndipe kuzwisisa, kuti ndizie zvapupu zvako.

¹²⁶ Yaanguva yokuti Mambo Mwari ashande, ngokuti vakagura mupango wako.

¹²⁷ Ngegwinyiso ndinoda mipango yako kupinda mukore, kupinda mukore wakanyunguruswa.

¹²⁸ Ngegwinyiso ndinohambisa zvitsiko zvangu mumipango yako yeshe; ndinozonda njira dzeshe dzokunyepa.

Chidisiso choKuda Kupurutana Mupango waMambo Mwari

¹²⁹ Mitemo yako inoshamisa; ndizvo mweya wangu unoingwarira.

¹³⁰ Kubeurwa kwemazwi ako kunojekisa; kunopa kuzwisisa kunevasina ruziyo.

¹³¹ Ndashama muromo wangu ndikahasaira, ngokuti ndinodisisa mipango yako.

¹³² Kunukukira kwendiri, undiitire nyasha, kudai ngomuitiro wako kuneavo vanoda zina rako.

¹³³ Gwinyisai tsoka dzangu kudai ngechigondiso chako; usatendera kushata nakamwe kuti kunditonge.

¹³⁴ Ndisunhure kubva mukutambudzwa ngevanhu, kuti ndingwarire mipango yako.

¹³⁵ Ita kuti hope yako ijeke padera pomuranda wako; undidzidzise zviemeso zvako.

¹³⁶ Madziso angu anoerera ndwizi dzemasodzi, ngokuti vanhu avangwariri mipango yako.

Kutonga Kwakanaka kwoMupango waMambo Mwari

¹³⁷ Iwewe wakarurama, A Mambo Mwari, nezvitongero zvako zvakarurama.

¹³⁸ Waemesa mitemo yako ngokururama nomuugondeki hweshe.

¹³⁹ Kutsamwirira kwangu kwandipedza, ngokuti magaa angu akanganwa mazwi ako.

¹⁴⁰ Chigondiso chako chakaedzwa yaamho, nomuranda wako unochida.

¹⁴¹ Ndiri mudoko nounoshoorwa, asi andikanganwi mipango yako.

¹⁴² Kururama kwako kuri kururama kwemhera nariini, nemipango yako ngeyegwinyiso.

¹⁴³ Dambudziko nokurwadziwa zvandigumira, asi mipango yako iri kudakara kwangu.

¹⁴⁴ Mitemo yako yakarurama mhera nariini; ndipe kuzwisisa, kuti ndirarame.

Mukumbiro woKuda Kununurwa

¹⁴⁵ Ndinodaidzira ngomwoyo wangu weshe; ndidaire, A Mambo Mwari. Ndinozongwarira zviemeso zvako.

¹⁴⁶ Ndinodaidza kwouri; ndiponese, kuti ndingwarire mitemo yako.

¹⁴⁷ Ndinomuka kutangira mambakwedza, nokuchemera kudetserwa; ndinoisa gonda rangu mumazwi ako.

¹⁴⁸ Madziso angu anobeuka kutangira mirindo yousiku yeshe, kuti ndipinimidze ngechigondiso chako.

¹⁴⁹ Munyasha dzako dzinorudo izwa izwi rangu; A Mambo Mwari, mukutonga kwako kwakanaka ndiponese.

¹⁵⁰ Avo vanonditambudza vanoteera kushata vanokwedzera pasinde; vari kuretu kwemipango yako.

¹⁵¹ Asi iwewe uri pasinde, A Mambo Mwari, nemipango yako yeshe ngeyegwinyiso.

¹⁵² Karetu ndakadzidza kubva kumitemo yako, kuti iwewe wakatsimisa mhera nariini.

Kupota ngoKuda Kudetserwa

¹⁵³ Ringira kutambudzika kwangu, undinunure, ngokuti andikanganwi mipango yako.

¹⁵⁴ Rwira ndaa yangu, undiripire; ndiponese kudai ngokugondisa kwako.

¹⁵⁵ Ruponeso ruri kuretu kwevakashata, ngokuti avatsvaki zviemeso zvako.

¹⁵⁶ Nyasha dzako dzinokungurira ihuru, A Mambo Mwari; ndiponese kudai ngezvitongero zvako.

¹⁵⁷ Vatambudzi vangu nemagaa angu vazhinji; asi andizi kupauka kubva mumitemo yako.

¹⁵⁸ Ndakaringira vanoshanda ngokuchengedzera, ndakatambudzika, ngokuti avangwariri mipango yako.

¹⁵⁹ Pinimidza madire endinoita mipango yako; ndiponese, A Mambo Mwari, kudai ngenyasha dzako dzinorudo.

¹⁶⁰ Zveshe zveizwi rako ngezvegwinyiso; nemipango yako yeshe yakarurama inondogara mhera nariini.

Kudzipira kuMupango waMambo Mwari

¹⁶¹ Vatongi vanonditambudza pasina ndaa, asi mwoyo wangu unotya mazwi ako.

¹⁶² Ndinodakara ngeizwi rako, kudai ngouwo waona zvakachakatwa zvizhinji.

¹⁶³ Ndinozonda nokunyangadzwa ngemagumbu, asi ndinoda mupango wako.

¹⁶⁴ Kanomwe pazuva ndinokukudza ngendaa yezvitongero zvako zvakarurama.

¹⁶⁵ Vanokunyarara kukurutu avo vanoda mipango yako; avana chinovapumhunisa.

¹⁶⁶ Ndinogonda ruponeso rwako, A Mambo Mwari, ndinoita mipango yako.

¹⁶⁷ Mweya wangu unongwarira mitemo yako; ndinoida kakurutu.

¹⁶⁸ Ndinongwarira mipango yako nemitemo yako, ngokuti njira dzangu dzeshe dziri pamberi pako.

Mukumbiro woKudetserwa

¹⁶⁹ Kuchema kwangu ngakugume pamberi pako, A Mambo Mwari; ndipe kuzwisisa kudai ngezvinoronza izwi rako.

¹⁷⁰ Kupota kwangu ngakugume pamberi pako; ndinunure kudai ngokugondisa kwako.

¹⁷¹ Miromo yangu inozodurura kukudza, ngokuti iwewe unondidzidzisa zviemeso zvako.

¹⁷² Rurumi rwangu runozoemba ngechigondiso chako, ngokuti mipango yako yeshe yakarurama.

¹⁷³ Nyara yako ngainasirirwe kundidetsera, ngokuti ndatsanangura nemipango yako.

¹⁷⁴ Ndinodisisa ruponeso rwako, A Mambo Mwari, mipango yako ndikwo kudakara kwangu.

¹⁷⁵ Mweya wangu ngaurarame, kuti uzokukudza; zvitongero zvako ngazvindidetsere.

¹⁷⁶ Ndapauka kudai ngegwai rakarashika; tsvaka muranda wako, ngokuti andikanganwi mipango yako. Nduyo yokukwira.