Nduyo 118 - Bhaibheri Rakachena muChindau

Mukumbiro woKubonga Kunyisa

¹ Bongai Mambo Mwari, ngokuti wakanaka; nyasha dzake dzinorudo dzinogara mhera nariini.

² Isuraeri ngaaronze kuti, “Nyasha dzake dzinorudo dzinogara mhera nariini.”

³ Mhatso yaAaroni ngaironze kuti, “Nyasha dzake dzinorudo dzinogara mhera nariini.”

⁴ Avo vanotya Mambo Mwari, ngavaronze vechiti, “Nyasha dzake dzinorudo dzinogara mhera nariini.”

⁵ Ndakadaidza kunaMambo Mwari ndiri mukutambudzika kwangu; Mambo Mwari wakandipingura, akandigadzika muugaro hwakapamhama.

⁶ Mambo Mwari uri parutii rwangu, andizotyi. Munhu ungaitenyi kwendiri?

⁷ Mambo Mwari uri parutii rwangu kundidetsera; ndinozoringira mukunyiswa kweavo vanondizonda.

⁸ Kwakapinda kunaka kuhwara munaMambo Mwari kune kugonda vanhu.

⁹ Kwakapinda kunaka kuhwara munaMambo Mwari kune kugonda vatongi.

¹⁰ Madzinza eshe akanditendenedza; muzina raMambo Mwari ndakaauraya.

¹¹ Akanditendenedza, akanditendenedza kumarutii eshe; muzina raMambo Mwari ndakaauraya.

¹² Akanditendenedza kudai ngenyuchi; akadzimwa kudai ngomuriro weminzwa; muzina raMambo Mwari ndakaauraya.

¹³ Ndakasukumidzwa ngesimba kuti ndiwe, asi Mambo Mwari wakandidetsera.

¹⁴ Mambo Mwari ndiye simba rangu noruyo rwangu; ndiye ruponeso rwangu.

¹⁵ Pane nduyo dzinodakadza dzokunyisa mumatende evakarurama: “Nyara yokumudyo yaMambo Mwari inonyisa ngesimba;

¹⁶ Nyara yokumudyo yaMambo Mwari yakamirudzwa; nyara yokumudyo yaMambo Mwari inonyisa ngesimba.”

¹⁷ Andizofi akadi, asi ndinozorarama, nokuteketesa mishando yaMambo Mwari.

¹⁸ Mambo Mwari wakandiorora kakurutu, asi aazi kundipira murufu.

¹⁹ Ndibeurire misiwo yokururama, kuti ndipotere mukati kubudikidza ndiyo, ndibonge Mambo Mwari.

²⁰ Uyu ndiwo musiwo waMambo Mwari; vakarurama vanozopotera ndiwo.

²¹ Ndinokubonga, ngokuti iwewe wakandipingura, ukaita muponesi wangu.

²² Buwe rakarambwa ngevaaki ndiro rakaita soro repakhona.

²³ Uku ndikwo kuita kwaMambo Mwari; kunoshamisa mukuona kwedu.

²⁴ Iri ndiro zuva raaita Mambo Mwari; ngatidakare tidakadzwe mweriri.

²⁵ Tiponese, tinokupota, A Mambo Mwari! A Mambo Mwari, tinokupota, tipei kubudirira!

²⁶ Unomuchena uwo unouya ngezina raMambo Mwari. Tinokukudza tiri mumhatso yaMambo Mwari.

²⁷ Mambo Mwari ndiye Mwari, naye wakatipa kujeka. Nematai munyara dzenyu, tangai kuforera dhiri, mwechitenderera arita.

²⁸ Iwewe ndiwe Mwari wangu, ndinozokubonga; ndiwe Mwari wangu, ndinozokutunhumadza.

²⁹ Bongai Mambo Mwari, ngokuti wakanaka, ngokuti nyasha dzake dzinorudo dzinogara mhera nariini.