Nduyo 115 - Bhaibheri Rakachena muChindau

Mwari Umwe weGwinyiso

¹ Haiwa kwetiri, A Mambo Mwari, haiwa kwetiri, asi ipa kunezina rako kuirikidzwa, ngendaa yenyasha dzako dzinorudo nokugondeka kwako.

² Ngenyi madzinza echiti, “Uri pari Mwari wavo?”

³ Mwari wedu uri mumatenga; unoita zveshe zvaanoda.

⁴ Miedzaniso yavo isirivha nomukore, mushando wenyara dzevanhu.

⁵ Inemiromo, asi aiereketi; inemadziso, asi aioni.

⁶ Inenzee, asi aizwi; inemiro, asi aizwi kunuhwa.

⁷ Inenyara, asi aibati; inetsoka, asi aihambi; aiereketi ngemikuro yayo.

⁸ Avo vanoinasira vakadai ndiyo; ndizvo munhu weshe unoigonda.

⁹ A Isuraeri, gonda iwewe munaMambo Mwari! Ndiye kudetswa kwavo nechihlangu chavo.

¹⁰ Imwimwi mhatso yaAroni, gondai munaMambo Mwari! Ndiye kudetswa kwavo nechihlangu chavo.

¹¹ Imwimwi munomutya Mambo Mwari, gondai munaMambo Mwari! Ndiye kudetswa kwavo nechihlangu chavo.

¹² Mambo Mwari waikarakadza tisu; unozotifumisa; unozofumisa vemhatso yaIsuraeri; unozofumisa vemhatso yaAroni;

¹³ unozofumisa avo vanomutya Mambo Mwari, veshe vakuru nevadoko.

¹⁴ Mambo Mwari ngaagare echimuwandisa, imwimwi nevana venyu.

¹⁵ Imwimwi fumiswai ndiMambo Mwari, uwo wakaita denga nenyika.

¹⁶ Matenga matenga aMambo Mwari, asi nyika wakapa vana vevanhu.

¹⁷ Vakafa avakudzi Mambo Mwari, nokuti avo vanodzaka mukunyarara.

¹⁸ Asi isusu tinozokudza Mambo Mwari kubvira zvino metsa mhera nariini. Kudzai Mambo Mwari!