Nduyo 114 - Bhaibheri Rakachena muChindau

Nduyo yePhasika

¹ Naapo vanhu vaIsuraeri vabva Egipite, mhatso yaJakobe yakabuda kubva kuvanhu vanoereketa ndimi yevapara,

² Judha wakaita ugaro hwaMwari hwakachena, Isuraeri wakaita umambo hwake.

³ Ruandhle rwakazviona, rukatiza; Jorodhani rakapetuka sure.

⁴ Mitunhu yakanyanduka kudai ngemagondohwe, nezvimitunhu zvakatomukatomuka kudai ngemakwayana.

⁵ Ngenyi, iwewe ruandhle, kuti utize? Iwewe Jorodhani, kuti upetuke sure?

⁶ A mitunhu, kuti munyanduke kudai ngemagondohwe? Nemwi zvimitunhu kuti murinyarinye kudai ngemakwayana?

⁷ Huta, iwewe nyika, ngokuapo kwaMambo Mwari, ngokuapo kwaMwari waJakobe,

⁸ uwo wakapindura buwe rikaita dziya remvura, nebuwe rakakonza kuriita chinyuka chemvura.