Nduyo 112 - Bhaibheri Rakachena muChindau

Kudakara kwoMunhu Wakanaka

¹ Kudzai Mambo Mwari! Unomuchena munhuwo unomutya Mambo Mwari, uwo unodakara kakurutu ngemipango yake.

² Mibarirwana yake inozoita simba padera penyika; mibarirwana yevakarurama inozofumiswa.

³ Zvakawanda noupfumi zviri mumhatso mwake, nokururama kwake kunogara mhera nariini.

⁴ Kunowakarurama kunobuda kujeka muchidima; unenyasha, unokungurira, wakarurama.

⁵ Kwakanaka kunomunhu unenyasha, unopa chikwereti vanhu vanomupombera; unobata ndaa yake mukutonga kwakanaka.

⁶ Ngokuti wakarurama aambozotsukunuswi; unozogara echicherechedzwa.

⁷ Aazotyi mashoko akashata; mwoyo wake wakatsima, unogonda munaMambo Mwari.

⁸ Mwoyo wake wakagwinyiswa, aazotyi; pamagumo unozoona kunyisa padera pemagaa ake.

⁹ Wakakoanisa ngokuda, akapa vatami; kururama kwake kunogara mhera nariini; runyanga rwake runozokuriswa mukuremeredzwa.

¹⁰ Wakashata unozozviona, anyangadzwe; unozomukwetsera mazino ake, anyunguruke; kudisisa kwevakashata kunozopera.