Nduyo 11 - Bhaibheri Rakachena muChindau

¹ Ndinohwara munaMambo Mwari; munozoita maronzerenyi kwendiri, kuti, “Tizira kumatunhu kudai ngeshiri.

² Ngokuti ringira, vakashata vakunga uta, vakhoka misee yavo parusinga, kuti vafure vakarurama mumwoyo muchidima.

³ Kuti madzeyo aputswa, vakarurama vangachaitenyi?”

⁴ Mambo Mwari uri mutemperi rake rakachena; Mambo Mwari, chigaro chake choumambo chiri mudenga. Madziso ake anoringira, tsiyo dzake dzinoedza vana vevanhu.

⁵ Mambo Mwari unoedza vakarurama nevakashata; nomweya wake unozonda avo vanoda kugebenga.

⁶ Unozonaisa masimbe omuriro nesorufu padera pevakashata; nedutu rinopisha rinozoita chikoaniswa chetsani yavo.

⁷ Ngokuti Mambo Mwari wakarurama; unoda zviito zvakarurama; vakarurama vanozoringira hope yake. KuneMutungamiriri woKuemba. Nduyo yaDhavhidha.