Nduyo 109 - Bhaibheri Rakachena muChindau

¹ Usanyarara, iwewe Mwari wendinokudza.

² Ngokuti muromo wowakashata nomuromo wounochengedza yakandishamira; vanoereketa ndini ngorurumi runonyepa.

³ Vanondiunganira ngemazwi okuzonda, nokurwa neni pasina ndaa.

⁴ Vanounzidzira rudo rwangu ngokundiitira ndaa, kunyazwi inini ndinovakumbirira.

⁵ Ndizvo vanondiunzidzira ngokushata ndavaitira zvakanaka, nokundizonda apo ndavada.

⁶ Vanoti, “Emesa munhu wakashata kuti arwe naye; gaa ngarieme ngokumudyo kwake.

⁷ Naapo atongwa, ngaaoneke anendaa; mukumbiro wake ngaupindurwe kuita chishaishi.

⁸ Mazuva ake ngaaite mashomani; umweni ngaatore mushando wake.

⁹ Vana vake ngavaite nherera, mukadzi wake ngaaite shirikadzi.

¹⁰ Vana vake ngavaite mipepeshekwa, vapemhe; ngavadzingwe kubva mumatongo mwevanogara.

¹¹ Mukweretesi ngaatore zveshe zvaanazvo; nevapara ngavachakate michero yokushanda kwake.

¹² Kusaapo naumwe unomuitira nyasha, nokuti umwe wokukungurira nherera dzake.

¹³ Mibarirwana yake ngaipedzwe; zina rake ngaridzimwe nokumubarirwana wechipiri.

¹⁴ Kushata kwemadzibaba ake ngakukarakadzwe pamberi paMambo Mwari; usatendera kuti chishaishi chamai ake chitsukutidzwe.

¹⁵ Ngazvigare zviripo pamberi paMambo Mwari, kuti adzime kukarakadzwa kwake munyika.

¹⁶ Ngokuti aazi kukarakadza ngokuonisa nyasha, asi wakatambudza munhu murombo nomutami, nowakasvipa mwoyo metsa pakufa kwavo.

¹⁷ Wakada kutuka, zvituko ngazvimugumire; Aazi kudakarira kufumisa, ngakuite kuretu kubva kwaari.

¹⁸ Wakadzifukidza ngezvituko kudai ngechokufuka chake, ngazvipotere mukati mwake kudai ngemvura, nokudai ngemafuta mumagodo ake.

¹⁹ Ngazvidai ngejira iro raanodzifukidza ndiro, kudai ngebhande raanodzisunga ndiro mazuva eshe.”

²⁰ Ngauite musharo wemagaa angu unobva kunaMambo Mwari, nowaavo vanoereketa zvakashata ngomweya wangu.

²¹ Asi iwewe, A Mambo Mwari, Mambo wangu, ndiitire ngendaa yezina rako; ngokuti nyasha dzako dzinorudo dzakanaka, ndinunure.

²² Ngokuti ndiri murombo nomutami, nomwoyo wangu unoremadzwa mukati mwangu.

²³ Ndapera kudai ngebvuri rinodzerera madeekoni, ndapepereswa kudai ngendongwe.

²⁴ Mabvi angu apera simba ngokuera kudya; nyama yangu yaonda nokutama mafuta

²⁵ Ndaa chiro chokutukwa kumagaa angu; apo voondiona, vanodzungudza masoro avo.

²⁶ Ndidetsere, A Mambo Mwari, Mwari wangu! Ndiponese kudai ngouwandu hwenyasha dzako dzinorudo.

²⁷ Ngavazie kuti iyi inyara yako; iwewe, Mambo Mwari, ndiwe wazviita.

²⁸ Ngavatuke, asi iwewe unozofumisa. Magaa angu ngaatsverudzwe; muranda wako ngaadakare.

²⁹ Magaa angu ngaapfekeswe ngokureruswa; ngavadziputire mukutsveruka kwavo kudai ngechokufuka.

³⁰ Ngomuromo wangu ndinozobonga Mambo Mwari kakurutu; ndinozomukurisa pakati pembungano.

³¹ Ngokuti unoema ngokumudyo kwomutami, kumuponesa kubva kuneavo vanotongera mweya wake rufu. Nduyo yaDhavhidha.