Nduyo 108 - Bhaibheri Rakachena muChindau

¹ Mwoyo wangu wakatsima, A Mwari, mwoyo wangu wakatsima; ndinozoemba, ndinozoemba zvakanaka kukukudza. Muka, mweya wangu!

² Muka, A chidangari nembira! Inini ndinozomusa mambakwedza.

³ Ndinozokubonga, A Mambo Mwari, pakati pembeu dzevanhu; ndinozoemba kukukudza pakati pemadzinza.

⁴ Ngokuti nyasha dzako dzinorudo ihuru kupinda matenga, nokugondeka kwako kunoguma mumakore.

⁵ Kudzwai, A Mwari, padera pematenga, nouthende hwako ngahuwepo padera penyika yeshe.

⁶ Ipa kunyisa ngenyara yako yomudyo nokundipingura, kuti avo vounoda vapokonyorwe.

⁷ Mwari wagondisa mukuchena kwake: “Mukudakara ndinozopaura Shekhemu, ndiedzanisire Bani reSukothi.

⁸ Gireadhi ngerangu; Manase ngerangu; Efuremu chiquoko changu; Judha indonga yangu youmambo.

⁹ Moabhi chidziyo changu chokushambiramwo; padera peEdhomu ndinozokandirapo gwada rangu. Padera peFiristia ndinodaidzira mukunyisa.”

¹⁰ Ndiani unozondiunza mudhorobha rakashosherwa? Ndiani unozonditungamirira kuenda Edhomu?

¹¹ Auzi kutiramba isusu here, A Mwari? Aubudi nehondo dzedu, A Mwari.

¹² A, tidetsere kurwa negaa, ngokuti kudetsera kwevanhu akuna shwiro.

¹³ NaMwari tinozoita ngoungwazi, ndiye unozotsikirira pashi magaa edu. KuneMutungamiriri woKuemba. Nduyo yaDhavhidha.