Nduyo 107 - Bhaibheri Rakachena muChindau

(Nduyo 107—150) MuKukudza kwoKunaka kwaMwari

BHUKU RECHISHANU.

¹ A, bongai Mambo Mwari, ngokuti wakanaka; ngokuti nyasha dzake dzinorudo dzinogara mhera nariini.

² Vakatengwa ndiMambo Mwari ngavaronze kudaro, avo vaakatenga kubva mumadambudziko

³ nokuvaunganidza kubva munyika, kubva kumabvazuva nokumabirirazuva, kubva dera nokubani.

⁴ Vamweni vakanzerereka mushango ngenjira yakadai ngomurubaya, vasikaoni guta rokugara;

⁵ vanenzara nenyota, mweya yavo yakafukama mukati mwavo.

⁶ Zvino vakachema kunaMambo Mwari mukutambudzika kwavo, naye wakavanunura kubva mumadambudziko avo;

⁷ wakavatungamirira ngenjira yakarurama, metsa vaguma mudhorobha rokugara.

⁸ Ngavabonge Mambo Mwari ngenyasha dzake dzinorudo, ngemishando yake inoshamisa yaanoitira vana vevanhu.

⁹ Ngokuti unogutisa mweya inenyota, nomweya inofa ngenzara unoigutisa ngezvakanaka.

¹⁰ Vamweni vakagara muchidima nomubvute rokufa, vechisungwa mumadambudziko nomusimbi,

¹¹ ngokuti vaiya vamukira mazwi aMwari, vakarasha kupanga kwoUripadera-pezveshe.

¹² Mwoyo yavo yakapfaiswa ngokushanda; vakawa pashi, pasina noumwe wokudetsera.

¹³ Zvino vakachema kunaMambo Mwari vari mumadambudziko avo, naye wakavaponesa kubva mumadambudziko avo.

¹⁴ Wakavabudisa kubva muchidima nomubvute rokufa, akadambura zvisungo zvavo.

¹⁵ Ngavabonge Mambo Mwari ngenyasha dzake dzinorudo, ngemishando yake inoshamisa yaanoitira vana vevanhu.

¹⁶ Ngokuti wakagura misiwo yethusi, akatematema migogo yesimbi.

¹⁷ Vamweni vakaita mapenzi ngendaa yokupauka kwavo, ngendaa yezvishaishi zvavo vakashingirira kutambudzwa.

¹⁸ Mweya yavo yakanyenya mbeu dzeshe dzezvokudya; nayo inokwedzera pasinde pemisiwo yokufa.

¹⁹ Zvino vakachema kunaMambo Mwari mukutambudzika kwavo, naye wakavanunura kubva mumadambudziko avo.

²⁰ Wakatumira izwi rake nokuvarapa, echivanunura kubva mukuparadzwa.

²¹ Ngavabonge Mambo Mwari ngenyasha dzake dzinorudo, ngemishando yake inoshamisa yaanoitira vana vevanhu.

²² Ngavape midiro yokubonga, vateketese mishando yake ngokuemba ngokudakara.

²³ Vamweni vakadzaka muruandhle vari mungarava, vechiita mushando mumvura zhinji;

²⁴ vakaona mishando yaMambo Mwari, mishando yake inoshamisa muruandhle rwakadzama.

²⁵ Ngokuti wakapanga, echivherudza dutu guru, rakamirudza mafungu oruandhle.

²⁶ Vakakwidzwa mudenga, vakadzaswazve muudzamu; mweya yavo yakakakaseka ngendaa yokutambudzwa;

²⁷ vakapeyamapeyama vechitandadzika kudai ngechiradza, navo avazi kuzia chokuita.

²⁸ Zvino vakachema kunaMambo Mwari mukutambudzika kwavo, naye wakavabudisa kubva mumadambudziko avo.

²⁹ Wakanyaradza dutu guru, nemafungu oruandhle akaterama.

³⁰ Zvino vakadakara ngokuti aterama; naye wakavakweera pandau yakanaka inodisiswa ndivo.

³¹ Ngavabonge Mambo Mwari ngenyasha dzake dzinorudo, ngemishando yake inoshamisa yaanoitira vana vevanhu.

³² Ngavamutunhumadze mumbungano yevanhu, vamukudze vari mumushongano wevakuru.

³³ Unopindura ndwizi kuita shango, nezvinyuka zvemvura kuita mavhu akaoma,

³⁴ nenyika yakavhundira kuita bare, ngendaa yokushata kwaavo vanogaremwo.

³⁵ Unopindura rubaya kuita makandwa emvura, nemavhu akaoma kuita zvinyuka zvemvura.

³⁶ Naapo unovagarisa vakafukama, kuti vanasirire dhorobha rokugaramwo.

³⁷ Vanokusha minda, vasime minda yemivhini, vanodzikaira michero yakawanda.

³⁸ Ngenyasha dzake unoita kuti vawande kakurutu; aatendi kuti n'ombe dzavo dzisvodze.

³⁹ Naapo vatsonzwa nokudzaswa pashi, ngendaa yokutambudzwa, madambudziko nokusvipa mwoyo,

⁴⁰ unodurura kushoorwa padera pevatongi, nokuvaita kuti vanzerereke mushango, umwo musina njira;

⁴¹ asi unomirudza vatami pakaturama kubva mukutambudzika, nokuwandisa vana vavo kudai ngomutanga wemapwizhi.

⁴² Vakarurama vanozviona, vanodakara; nokushata kweshe kunotsiira muromo wakwo.

⁴³ Uwo wakangwara ngaangwarire izvo zviro, naye ngaapinimidze ngenyasha dzinorudo dzaMambo Mwari. Ngoma. Nduyo yaDhavhidha.