Nduyo 105 - Bhaibheri Rakachena muChindau

Mwari neVanhu vake

¹ Bongai Mambo Mwari, mudaidze zina rake, ziisai zviito zvake pakati pevanhu.

² Embai kwaari, embai kukudza kwaari; ereketai imwimwi ngemishando yake yeshe inoshamisa.

³ Ganzai imwimwi ngezina rake rakachena; mwoyo yaavo vanotsvaka Mambo Mwari ngaidakare.

⁴ Tsvakai Mambo Mwari nesimba rake; tsvakai hope yake ngokusikareki.

⁵ Karakadzai mishando inoshamisa yaakaita, mishamiso yake, nezvitongero zvomuromo wake,

⁶ imwimwi mibarirwana yaAbrahama muranda wake, imwimwi vana vaJakobe vakatsanangurwa vake.

⁷ NdiMambo Mwari, Mwari wedu; kutonga kwake kuri munyika yeshe.

⁸ Unokarakadza ngechitenderano chake mhera nariini, izwi raakapanga kunemibarirwana gumi remazana,

⁹ chitenderano chaakaita naAbrahama, nemhiko yake yaakapika kunaIsaka,

¹⁰ iyo yaakagwinyisa kunaJakobe kuita chiemeso, kunaIsuraeri kuita chitenderano chemhera nariini

¹¹ echiti, “Kwouri ndinozopa nyika yeKhenani, kuita chikoaniswa chenhaka yako.”

¹² Naapo vaiya vashomani pauwandu, vashomani yaamho, vari zvigarandimo mukati mwayo,

¹³ vakanzerereka kubva kudzinza kuenda kudzinza, kubva kuumambo umwe kuenda kuvanhu vamweni,

¹⁴ aazi kutendera naumwe kuti avatambudze; wakakaraidza madzimambo ngendaa yavo

¹⁵ echiti, “Musagwama vakadzodzwa vangu; musaita zvakashata kunevaprofeti vangu.”

¹⁶ Naapo paakadaidza nzara kuti iuye panyika, nokugura ndonga yeshe yezvingwa,

¹⁷ waiya atuma munhu pamberi pavo, Josefa uwo wakatengeswa kuita hloko.

¹⁸ Vakasvonhora tsoka dzake ngemanguri, mutsipa wake wakaiswa mugangiro resimbi;

¹⁹ metsa yakaguma nguva yerakaitika ndiro izwi rake, izwi raMambo Mwari rakaramba rechimuedza.

²⁰ Mambo wakatumira vanhu koomusunhura; mutongi wembeu dzevanhu wakamusunhura.

²¹ Wakamuita mambo wemhatso yake, nomutongi wepfuma yake yeshe,

²² kudzidzisa vatongi vake kudai ngokuda kwake, nokudzidzisa vakuru vake ungwaru.

²³ Zvino Isuraeri wakaguma Egipite; Jakobe wakaita chigarandimo munyika yaHamu.

²⁴ NaMambo Mwari wakawandisa vanhu vake kakurutu, akavaita kuti vagwinye kupinda magaa avo,

²⁵ avo vaakakunukudza mwoyo yavo kuti izonde vanhu vake, kuti vabate varanda vake ngourimbwi.

²⁶ Wakatuma muranda wake Mosi naAroni avo vaaiya atsanangura.

²⁷ Vakaita zvioniso zvake pakati pavo, nemishamiso munyika yaHamu.

²⁸ Wakatuma chidima, akaita kuti nyika isvipe; navo vakamukira mazwi ake.

²⁹ Wakapindura mvura yavo ikaita ngazi, akaita kuti hove dzavo dzife.

³⁰ Nyika yavo yakazara ngemachedye, kunyazwi nomumhatso dzemadzimambo avo.

³¹ Wakaereketa, kukabuda mitanda yenhunzi, nenhata dzakazadza nyika yavo yeshe.

³² Wakavapa matsanza paugaro pemvura, nemheni yakaita mirazvu munyika yavo.

³³ Wakavhuna mivhini yavo nemionde yavo, akagura miti yenyika yavo.

³⁴ Wakaereketa, nendongwe dzakaguma, negwata rakawandisa;

³⁵ zvakadya miriwo yeshe yaiya munyika yavo, zvakadya michero yenyika yavo.

³⁶ Wakauraya matangwe eshe munyika yavo, matangwe esimba ravo reshe.

³⁷ Zvino wakabudisa Isuraeri nesirivha nomukore, paiya pasina naumwe pakati pedzinza ravo wakapumhunwa.

³⁸ VaEgipite vakadakara apo pevakabudamwo, ngokuti kutyisa kwavo kwakaguma padera pavo.

³⁹ Wakatambanudza gore kuita chifukidzo, nomuriro wakavajekisira usiku.

⁴⁰ Vakakumbira, naye wakavaunzira zvimataata, akavagutisa ngokudya kunobva mudenga kwakawandisa.

⁴¹ Wakabeura buwe, nemvura yakatsvotsvoma; yakaerera mundau dzakaoma kudai ngorwizi.

⁴² Ngokuti wakakarakadza chigondiso chake chakachena naAbrahama muranda wake.

⁴³ Ndizvo wakabudisa vanhu vake vechidakara, vakatsanangurwa vake vechiemba.

⁴⁴ Wakavapa nyika dzemadzinza, navo vakatora kuita nhaka yavo upfumi wevanhu,

⁴⁵ kuti vangwarire zviemeso zvake, vapurutanezve mipango yake. Kudzai Mambo Mwari!