Nduyo 104 - Bhaibheri Rakachena muChindau

MuKukudzwa kwoMusiki

¹ Kudza Mambo Mwari, A mweya wangu. A Mambo Mwari, Mwari wangu, wakakurisa! Wakafuka mbiri noumambo.

² Unofuka kujeka kudai ngechokupfeka; unotambanudza matenga akadai ngetende;

³ unoemesa sika dzemhatso yake mumvura; unoita makore ngoro yake; unogadha padera pemaphaphiro edutu.

⁴ Unoita dutu kuti riite vatumwa vake; unoita varanda vake mirazvu yomuriro.

⁵ Wakaemesa nyika padera pemadzeyo ayo, kuti isazombotsukunuswi.

⁶ Unoifukidza ngoruandhle kudai ngechokufuka; mvura yakaterama padera pemitunhu.

⁷ Ngokukaraidza kwako yakatiza; ngokuzwika kwokutinhira kwako, yakakasira kuenda.

⁸ Yakakwira kumatunhu, yakadzaka mumapani, kundau yowakaiemesera.

⁹ Wakaemesa mugano kuti isadarika, kuti isachauyazve kumbonya nyika.

¹⁰ Unonyusa zvinyuka mumapani; zvinopopoma pakati pemitunhu.

¹¹ Zvinomwisa mhuka yeshe yomushango; mbongoro dzomushango dzinodzima nyota yadzo.

¹² Shiri dzomudenga dzinoaka zvisaki zvadzo pasinde pazvo, dzinoemba pakati pematai.

¹³ Unodiridzira mitunhu kubva mukamera rako; nyika yagutiswa ngemichero yemishando yako.

¹⁴ Unoita kuti mwenje ukure wen'ombe, nezvisimwa kuita kudya kwevanhu, kuti amerise kudya munyika,

¹⁵ nevhini rinodakadza mwoyo yomunhu, nemafuta anoita kuti hope in'anikire, nechingwa chinogwinyisa mwoyo womunhu.

¹⁶ Miti yaMambo Mwari inodiridzirwa kakurutu, misedhare yeRebhanoni yaakasima.

¹⁷ Mukati mwayo shiri dzinoaka zvisaki zvadzo; usore unemhatso yawo mumiti yemisaipurasi.

¹⁸ Mitunhu yakaturama ngeyembudzi dzomushango; mapuwe mapako okuhwara embira.

¹⁹ Wakaemesa mwedzi kuti ugure nguva; zuva rinozia kupota kwaro.

²⁰ Iwewe unoita chidima kuti uapo usiku, apo mhuka dzeshe dzomugwasha dzinobuda dzechigwezva.

²¹ Mhondoro itsva dzinokwanga dzechirumbirira zvokudya, dzechitsvaka kudya kwadzo kubva kunaMwari.

²² Naapo zuva perinobuda dzinopetuka, dzorodzoata mumapako adzo.

²³ Munhu unobuda kuenda kumushando wake nokushanda metsa madeekoni.

²⁴ A Mambo Mwari, mishando yako aibviri ngokuwanda! Wakaita yeshe ngoungwaru; nyika yakazara ngezvisikwa zvako.

²⁵ Pamberi pano ruandhle rwakakura nokupamhama, mukati mwaro munohamba zviro zvinotamanda zvisikaerengeki, zviro zvinopona zvidoko nezvikuru.

²⁶ Umwo munohamba ngarava; umwo muneLevhiathani yowakaita kuti itambe mukati mwarwo.

²⁷ Zveshe izvi zvinogarira kweuri, kuti uzvipe kudya kwazvo ngenguva kwayo;

²⁸ naapo wazvipa, zvinozviunganidza pamwepo; naapo wabeura nyara yako, zvinogutiswa ngezvakanaka.

²⁹ Naapo unofisha hope yako, zvinotambudzika; naapo unotora mweya wazvo, zvinofa, nokuhwirirazve kuita bukuta.

³⁰ Naapo peunotuma mweya wako, zvinosikwa; nokumusirira utsva hwehope yenyika.

³¹ Mbiri yaMambo Mwari ngaigare mhera nariini; Mambo Mwari ngaadakare ngemishando yake,

³² uwo unoringira panyika, nayo inotengenda, uwo unogwama mitunhu yoroyopwititika chiushi.

³³ Ndinozoembera Mambo Mwari apo ndichapona; ndinozoemba kukudza Mwari wangu ndichazwa.

³⁴ Murangariro wangu kwaari ngauite wakanaka ngokuti ndinodakara munaMambo Mwari.

³⁵ Vashaishi ngavapedzwe munyika, nevakashata vasachaapo. Kudza Mambo Mwari, A mweya wangu. Kudza Mambo Mwari.