Nduyo 103 - Bhaibheri Rakachena muChindau

¹ Kudza Mambo Mwari, A mweya wangu, nazvo zveshe zviri mukati mwangu, ngazvikudze zina rake rakachena.

² Kudza Mambo Mwari, A mweya wangu, usariyarwa zvifumiso zvake zveshe,

³ uwo unorekerera zvishaishi zvako zveshe, unorapa matenda ako eshe,

⁴ uwo unoripira ndaramo yako kubva muhunza, unokugadza ngenyasha dzinorudo nedzinokungurira,

⁵ uwo unokugutisa ngezviro zvakanaka apo uchapona, kuitira kuti utsva hwako humusirirwe kudai ngegodzi.

⁶ Mambo Mwari unoita mishando yakarurama, echitongera zvakanaka veshe vanotambudzwa.

⁷ Wakaita kuti Mosi azie njira dzake, nemishando yake kunevana vaIsuraeri.

⁸ Mambo Mwari wakazara ngenyasha nokuzwira urombo, unononoka kutseneka, unowanza kuitira nyasha dzinorudo.

⁹ Aazogari echiitira ndaa, nokuti kugara akatseneka mhera nariini.

¹⁰ Aatiitiri kudai ngezvishaishi zvedu, nokuti kutiunzidzira kudai ngokushata kwedu.

¹¹ Ngokuti kudai ngokuturama kwedenga padera penyika, ngokudaro nyasha dzake dzinorudo dzakakura kuneavo vanomutya;

¹² kudai ngokutaraukirana kwemabvazuva nemabirirazuva, ndizvo unotarausa zvishaishi zvedu kubva kwetiri.

¹³ Kudai ndibaba vanokungurira vana vavo, ngokudaro Mambo Mwari unokungurira avo vanomutya.

¹⁴ Ngokuti unozia kururwa kwedu; unokarakadza kuti tiri bukuta.

¹⁵ Ngendaa yomunhu, mazuva ake akadai ngomwenje; unomerera kudai ngeruwa romushango;

¹⁶ Ngokuti dutu rinofuridza ngepadera paro, naro rinopera, nendau yaro aichazoriziizve.

¹⁷ Asi nyasha dzinorudo dzaMambo Mwari dzinogara dzakadaro kubvira mhera nariini metsa mhera nariini kuneavo vanomutya, nokururama kwake kunogara kuripo kunevana vevana,

¹⁸ kwevari avo vanongwarira chitenderano chake nokukarakadza kuita mipango yake.

¹⁹ Mambo Mwari wakaemesa dendemaro rake mudenga, noumambo hwake hunotonga padera pazvo zveshe.

²⁰ Kudzai Mambo Mwari, imwimwi ngirosi dzake, imwimwi ngwazi munoita zvinoronzwa ndiye, mwechipurutana izwi rake raakaereketa.

²¹ Kudzai Mambo Mwari, imwimwi mweshe hondo dzake, imwimwi varanda vake munoita kuda kwake.

²² Kudzai Mambo Mwari, imwimwi mishando yake yeshe, mundau dzeshe dzaanotonga. Kudza Mambo Mwari, A mweya wangu.