Nduyo 102 - Bhaibheri Rakachena muChindau

¹ Izwa mukumbiro wangu, A Mambo Mwari; kuchema kwangu ngakugume kwouri.

² Usafisha hope yako kubva kwendiri ngezuva rokutambudzika kwangu. Ungamisira nzee yako kwendiri; ngokukasira ndipingure ngezuva rendinodaidza kwouri.

³ Ngokuti mazuva angu anopwititika kudai ngechiushi, nemagodo angu anopisha kudai ngechoto.

⁴ Mwoyo wangu watemwa nokufota kudai ngomwenje; ndinoriyarwa kudya chingwa changu.

⁵ Ngendaa yeizwi rokugwimba kwangu, magodo angu anobatira munyama yangu.

⁶ Ndinotodzana nezizi romushango; ndadai ngekazizi komumatongo.

⁷ Andiati; ndinodai ngechiwanzaburi chiri chega pachachungu chemhatso.

⁸ Magaa angu anonditsverudza zuva reshe; avo vanoushungu kwendiri vanoshandisa zina rangu kuita chituko.

⁹ Ngokuti ndinodya marota kudai ngechingwa, nokubvengedza misodzi nemvura yangu yokumwa,

¹⁰ ngendaa youshungu hwako hunorunya; ngokuti iwewe wandimirudza ukandirasha.

¹¹ Mazuva angu akadai ngebvuri remadeekoni; ndinofota kudai ngomwenje.

¹² Asi iwewe Mambo Mwari unogara padendemaro mhera nariini; zina rako rinozokarakadzwa kumibarirwana yeshe.

¹³ Iwewe unozomiruka nokuitira nyasha Zioni, ngokuti yaanguva yokurikungurira; nguva yakaemeswa yasvika.

¹⁴ Ngokuti varanda vako vanodakara ngemapuwe aro, vanozwira urombo bukuta raro.

¹⁵ Madzinza anozotya zina raMambo Mwari, nemadzimambo eshe enyika anozotya mbiri yako.

¹⁶ Ngokuti Mambo Mwari unozoaka Zioni; unozooneka muuthende hwake.

¹⁷ Unozopurutana mukumbiro wevasina chiro, naye aazoshoori mukumbiro wavo.

¹⁸ Izvi ngazvinyorerwe mibarirwana inoteera, nevanhu vanozosikwa vanozokudza Mambo Mwari:

¹⁹ kuti wakaringira pashi ari muugaro hwake hwakaturama, hwakachena; Mambo Mwari wakaringira munyika ari mudenga,

²⁰ kuzwa kugwimba kwemabhanditi, nokusunhura avo vakaemeserwa rufu;

²¹ kuti vanhu vateketese zina raMambo Mwari muZioni, nokukudzwa kwake muJerusarema,

²² apo vanhu vashongana pamwepo, noumambo, kudira Mambo Mwari.

²³ Watsonza simba rangu munjira; wafupisa mazuva okupona kwangu.

²⁴ “A Mwari wangu,” ndinoti, “Usanditora zvinopano asati apera mazuva okupona kwangu, iwewe makore ako anogara aripo kumibarirwana yeshe.

²⁵ Iwewe wakagadzika madzeyo enyika kare kare, nematenga mushando wenyara dzako.

²⁶ Zvinozopera, asi iwewe unozogara; zveshe zvinozotsakara kudai ngejira. Unozoapindura kudai ngechokufuka, nazvo zvinozopera;

²⁷ asi iwewe unozogara wakadaro, nemakore ako aatongozoperi.

²⁸ Vana vevaranda vako vanozogara vakangwaririka; mibarirwana yavo inozoemeswa pamberi pako.” Nduyo yaDhavhidha.