Nduyo 10 - Bhaibheri Rakachena muChindau

Mukumbiro woKururama

¹ Unoemerenyi kuretu, A Mambo Mwari? Unodzifishirenyi ngenguva yokutambudzika?

² Wakashata mukudzikudza kwake unotambudza varombo; ngaabatwe ngemazano aakaronga.

³ Ngokuti wakashata unoganza ngokuemura kwomwoyo wake, nomuemuri unoramba, unosvisva Mambo Mwari.

⁴ Wakashata ngokudzikudza kwehope yake unoti, “Mwari aazondibvunzi.” Mikarakadzo yake yeshe inoti, “Akuna Mwari.”

⁵ Njira dzake dzinobudirira nguva dzeshe; zvitongero zvake zvakaturama kwakadai, madziso ake aazvioni; magaa ake eshe anomunjenamira.

⁶ Unopinimidza mumwoyo mwake, “Andizotsukunuswi; mumibarirwana yeshe andizooni dambudziko.”

⁷ Muromo wake wakazara ngokutuka, kuchengedza nokutambudza; pashi porurumi rwake pano kuangarara nokushaisha.

⁸ Unogara mundau dzokuhwarira dzomumaguta; mundau dzakafishika unouraya vasina ndaa. Madziso ake anozvaura vasina simba ngokufishika.

⁹ Unohwarira pakasitika kudai ngemhondoro iri muchikwasha chayo. Unohwarira kubata varombo; unobata varombo echivakweya ngomumbure wake.

¹⁰ Unondondera, unokotama, kuti usina simba arigwe ngevanesimba vake.

¹¹ Unoti mumwoyo mwake, “Mwari wariyarwa; wafisha hope yake, aazozvioni mhera nariini.”

¹² Miruka, A Mambo Mwari; A Mwari, mirudza nyara yako; usariyarwa vakatsikirirwa.

¹³ Chiinyi kuti wakashata ashoore Mwari, unoti mumwoyo mwake, “Aazotibvunzi?”

¹⁴ Asi iwewe unoona! Ngegwinyiso unoona dambudziko nokuchema, kuti ukutore munyara dzako; usina simba unodzipira kwouri; iwewe waiya mudetseri wenherera.

¹⁵ Gura maoko owakashata nounoita zvakashata; tsvakisisa kushata kwake metsa ukutame.

¹⁶ Mambo Mwari ndiMambo mhera nariini; madzinza anozopera kubva munyika yake.

¹⁷ Mambo Mwari, unozozwa chidisiso chevakapfaa; unozogwinyisa mwoyo yavo, unozoita kuti nzee yako izwe

¹⁸ kuti mutongere nherera nevanotambudzwa, kuti munhu uri munyika asachatyisa. KunaMutungamiriri woKuemba. Nduyo yaDhavhidha.