Nah. 3 - Bhaibheri Rakachena muChindau

¹ Ihehe dhorobha rinoparadza ngazi! Rakazara reshe ngemanyepo nokuba; aritongorekeri kupamba.

² Bope rechiswepu ririmwo, bope rokukwesana kwemavhiri, nerokutomuka kwemahachi, nerokunyanduka kwengoro.

³ Vanogadha mahachi vanomirudza shoti inon'anikira nomukhondo unon'anikira; vazhinji vakaurawa, mirwi yevakafa; miiri yakafa isina magumo; vanopumhunwa padera pemiiri yevakafa.

⁴ Ngendaa youwandu hwokuhura kwehure, rinonasa kuringirika, mai wokurowa, uwo unotengesa madzinza ngokuhura kwake, nevanhu kubudikidza ngokurowa kwake.

⁵ Ringira, ndinorwisana newe, unoronza Mambo Mwari wehondo; “Neni ndinozofukura zvokusimira zvako metsa kuhope yako; ndinozoita kuti madzinza aringire utitinini hwako, noumambo huringire kutsveruka kwako.

⁶ Ndinozokandira tsvina padera pako, ndikuite unonyangadzwa, ndikuemese kuti uite unodzvuturirwa.

⁷ Zvino veshe vanokuona vanozotiza kubva kwouri, vechiti, ‘Ninevhe raparadzwa; ndiani unozorichema? Ndinozotsvaka pari vaembedzeri vako?’ ”

⁸ Wakanaka kupinda Noamoni here, iro rakagara pakati pendwizi Naire, nemvura yakaritendenedza, rushosha rwaro rwaiya ruandhle, norukumbati rwaro rwaiya ruandhle?

⁹ Ethiopia neEgipite raiya simba raro, naro raiya risina magumo; Phuti naRibhia dzaiya vadetseri vako.

¹⁰ Asi rakaita hloko, rakaenda muusungwa, kunyazwi vana varo, vadoko vakapwanyiwa kuita zvigurwa dera kwemapato eshe; mabhigidha akaitwa ngendaa yevakuru varo vakuru varo veshe vakasungwa ngemanguri.

¹¹ Iwewewo unozoraradza, unozohwara; unozotsvaka bako kubva kumagaa.

¹² Mapako ako eshe anodai ngemiti yemionde inemaonde otanga kuibva; kudai yechizungunyiswa, anowira mumuromo wouwo unodya.

¹³ Ringira, varwi vehondo vakadzi pakati pako. Misiwo yenyika yako yabeurwa yaamho kumagaa ako; muriro wapedza mipingidzo yemisiwo yako.

¹⁴ Dzicherere mvura yomukuwo wokukombiwa kwako, gwinyisa marusvingo ako; enda mudhaka, utsikatsike matope, ubate foroma yezvidhina.

¹⁵ Naapo muriro unozokupedza; shoti inozokupedza. Inozokupedza kudai ngendongwe. Dziwanze kudai ngendongwe, dziwanze kudai ngegwata rendongwe.

¹⁶ Wakawanza vatengesi vako kupinda nyeredzi dzomudenga. Asi zvino vaenda kudai ngendongwe dzinotambanudza maphaphiro adzo, dzechimbururuka kuenda kuretu.

¹⁷ Vangwariri vako vakadai ngegwata rendongwe, vanyori vako vakadai ngegwata rinogara padera perushosha ngezuva rechando, apo zuva rabuda rinombururuka; apana naumwe unozia kuti raenda pari.

¹⁸ Vaushi vako vanoata, O mambo weAsiria; vakuru vako vanoata mubukuta. Vanhu vako vakapararira padera pemitunhu, akuna naumwe unovaunganidza.

¹⁹ Akuna kuporeswa kwokuremadzwa kwako; ronda rako arirapiki. Veshe avo vanozwa mbiri yako vanoembera nyara ndiwe. Ngokuti ndiani wakambotiza kushata kwako kusina magumo?