Nah. 2 - Bhaibheri Rakachena muChindau

Kuwa kweNinevhe

¹ Muparidzi wakwira kurwa newe. Ngwarira marukumbati, rinda njira, sungisa zviunu zvako, unganidza simba rako reshe.

² (Ngokuti Mambo Mwari unopetudza runako rwaJakobe, pamwepo norunako rwaIsuraeri, kunyazwi vapambi vakavapamba, nokuparadza matai avo.)

³ Zvihlangu zvengwazi dzake zvakatsvukiswa, varwi vake vakasimira zvakatsvukuruka. Simbi dzengoro dzinopenya kudai ngemirazvu ngezuva raanodzinasirira, mikhondo inozungunyiswa ngenjira inotyisa.

⁴ Mujaho wengoro unorumbiswa mumapato, dzinorumba mberi nesure ngemumapato akapamhama; kuoneka kwadzo kwakadai ngemasasi, dzinozokasira kudai ngemheni.

⁵ Unodaidza vakuru vake; vanopumhunwa mukufora kwavo, vanokasira kuenda kurukumbati, nokuemesa chivhariso.

⁶ Misiwo yendwizi inobeurwa, ngome inohuta.

⁷ Kwaemeswa kuti dhorobha riiswe muusungwa, hloko dzaro dzevakadzi vanotungamirirwa kuenda vechibonda kudai ngenjiya, vechichaya maditi avo.

⁸ Ninevhe rakadai ngegandwa remvura, iro mvura yaro inoerera kuenda kuretu. Vanodaidzira kuti, “Emai, emai;” asi akuna naumwe unoringira sure.

⁹ Pambai sirivha, pambai mukore! Akuna magumo oupfumi! Uwandu hwechiro cheshe chinomutengo mukuru.

¹⁰ Arichina chiro, rapererwa, raitwa dongo raparadzwa! Mwoyo inonyunguruka nemabvi anohuta, zviunu zveshe zvinogedageda, hope dzeveshe dzarwarwauka.

¹¹ Chiinyi chakaitika ngerindi remhondoro, bako rokudyira remhondoro itsva, apo peinoenda mhondoro, nevana vemhondoro, kusina naumwe unodzityisidzira?

¹² Mhondoro yabaura kuita zvigurwa zvakakwanira zvana zvayo, nokushongorora zvokupa vakadzi vayo; yazadza mapako ayo ngezvakarumwa, nemirindi yayo ngezvigurwa zvenyama.

¹³ “Ringira, ndinorwisana newe,” unoronza Mambo Mwari wehondo, “Neni ndinozopisha ngoro dzaro muchiushi, neshoti inozopedza mhondoro itsva dzaro; ndinozodusa zvewakapamba kubva munyika, neizwi revatumwa vako arichazombozwiki.”