Nah. 1 - Bhaibheri Rakachena muChindau

¹ Chiprofeti ngendaa yeNinevhe. Bhuku rechioniso chaNahume muErikoshi.

Ushungu hwaMambo Mwari padera peNinevhe

² Mwari unendurumwa, nounounzidzira ndiye Mambo Mwari; Mambo Mwari unounzidzira noushungu; Mambo Mwari unozounzidzira padera pemagaa ake, unongwarira ushungu hwake padera pemagaa ake.

³ Mambo Mwari unononoka kunyangadzwa, asi wakakura musimba guru, aazopembedzi vakashata. Mambo Mwari unenjira yake iri muchipupuri nomumubvumo, nemakore ibukuta retsoka dzake.

⁴ Unokaraidza ruandhle nokuruomesa, naye unoomesa ndwizi dzeshe; Bhashani neKharmeri zvinofota, neruva reRebhanoni rinozeketera.

⁵ Mitunhu inozungunyika pamberi pake, nezvimitunhu zvinonyunguruka; nyika inohuta pamberi pake, nyika nazvo zveshe zvinogaramwo.

⁶ Ndiani ungakona kuema pamberi poushungu hwake? Ndiani ungakona kugara mukupisha kwoushungu hwake? Ushungu hwake hunodururwa kudai ngomuriro, nokubudikidza ndiye mapuwe anopwanyika kuita zvigurwa.

⁷ Mambo Mwari wakanaka, ndiye bako ngezuva rokutambudzika; naye unongwarira avo vanohwara mwaari.

⁸ Kunyazwi mundambi inopopoma, unozopedza ndau yaro yaamho, naye unozorumbirira magaa ake muchidima.

⁹ Ngenyi mwechimukira Mambo Mwari? Unozonasira magumo; akuna gaa rinozomiruka.

¹⁰ Kudai ngeminzwa yakakodyana, kudai ngezviradza zvaradziswa ngokumwa kwavo, vanozopishwa kudai ngematsotso akaoma.

¹¹ Kubva kweuri kwabuda umwe unoronga zvakashata ndiMambo Mwari, uwo unopanga zvakashata.

¹² Izvi ndizvo zvinoronza Mambo Mwari: “Kunyazwi vanokugwinya kweshe nokuwanda, vanozotemerwa pashi nokuparara. Kunyazwi ndakakutambudza, andichazokutambudzizve.

¹³ Nazvino ndinozogura joka rake kubva kwouri, nokudambura zvisungo zvakakusunga.”

¹⁴ Mambo Mwari wakapa mupango ngendaa yako, kuti zina rako risachazokushwa: kubva kumhatso yezvimwari zvako ndinozogura muedzaniso wakatsetswa, nomuedzaniso wakanyunguruswa. Ndinozonasira iba rako, ngokuti iwewe aunashwiro.

¹⁵ Ringira! Padera pemitunhu tsoka dzouwo unounza mashoko akanaka, unoteketesa kunyarara! Ngwarira mishongano yako yokudya, O Judha, ita zvowakapika, ngokuti akuchazoitikizve kuti wakashata akupambe, ngokuti waparadzwa yaamho.