Muchu. 9 - Bhaibheri Rakachena muChindau

¹ Zveshe izvi ndakapinimidza ndizvo mumwoyo mwangu, ndechitsvakisisa izvi zveshe, kuti vakarurama nevakangwara nemishando yavo zviri munyara yaMwari; akuna munhu unozia kuti rudo nokuti kuzonda. Zveshe zviri pamberi pake azvina shwiro,

² zvinoitika zvakatodzana kwevari veshe, vakarurama nevakashata; kune wakanaka nowakashata, wakasukika nousikazi kusukika, kwaari unopira midiro, nokwaari usikapiri midiro. Kudai ngezvinoitika kunowakanaka, ndizvo zvinoitika kunomushaishi; uwo unopika mhiko wakadai ngouwo unotya kupika mhiko.

³ Uku ndikwo kushata kuri pakati pezviro zveshe zvinoitwa pashi pezuva, kuti chipo chakatodzana chinoitika kwevari veshe! Zvakanyadaro, mwoyo yevanhu yakazara ngokushata; upengo huri mumwoyo mwavo apo vachapona, ngesure kweizvo vanoenda kunevakafa.

⁴ Asi kunyazwi ndiani unobatanidzwa nevanopona vanakwo kugonda, ngokuti imbwa inopona yakapinda kunaka kupinda mhondoro yakafa.

⁵ Ngokuti vanopona vanozia kuti vachazofa, asi vakafa avana chevanozia; avachaashiri muthuso, kunyazwi nokucherechedzwa kwavo apachina.

⁶ Rudo rwavo, nokuzonda kwavo, nokuemura kwavo kwakatopera; zve, avachazooni chikoaniswa munecheshe chinoitwa pashi pezuva.

⁷ Enda hako, udye kudya kwako ngokudakara, wechimwa vhini rako unomwoyo unodakara; ngokuti Mwari unoashira mishando yako.

⁸ Zvokusimira zvako ngazvigare zvakachena; nesoro rako ngarigare rechidzodzwa mafuta.

⁹ Gara ngokudakara nomukadzi wounoda mazuva eshe okupona kwako kusina shwiro, owakapuwa pashi pezuva, ngokuti ndicho chikoaniswa chako mukupona kwako uku, nomushando wako wounoshanda pashi pezuva.

¹⁰ Kunyazwi chiinyi cheinoona nyara yako kuita, chiite ngesimba rako reshe; ngokuti akuna mushando, nokuti kupinimidza, nokuti ruziyo, nokuti ungwaru, muiba, apo pounoenda.

¹¹ Zve ndakaona kuti pashi pezuva mujaho aubudirirwi ngendaa yokukasira kurumba, nokuti kurwa hondo akunyiswi ngendaa yokuane simba, nokuti zvokudya azvionwi ngoungwaru, zve nokuti upfumi ahuoneki kuvanhu ngendaa yokuzwisisa kwavo, nokuti nyasha adzipuwi kuvanhu ngendaa yokuti ingwazi; asi zveshe zvinoitika kudai ngomukuwo nokuitika.

¹² Ngokuti munhu aazii nguva yake yedambudziko. Kudai ngehove dzinobatwa muchitaa chakashata, nokudai ngeshiri dzinobatwa mumurau, ndizvo vanhu vanobatwa pamukuwo wakashata, apo perinowira padera pavo chiriporipo.

Mukarakadzo ngoUngwaru noUpenzi

¹³ Ndaonazve ichi chionero choungwaru pashi pezuva, nacho chakaoneka chakakura kwendiri.

¹⁴ Raiyapo dhorobha doko, nevanhu vashomani mukati mwaro. Mambo mukuru wakauya koorwa naro, naye wakarikomba, akaaka marukumbati makuru kurirwisa.

¹⁵ Zvino kwakaoneka mukati mwaro munhu murombo wakangwara, nouyu munhu ngoungwaru hwake wakaponesa dhorobha. Asi akuna naumwe wakazokarakadza uwo munhu murombo.

¹⁶ Ndizvo ndinoti, “Ungwaru hwakapinda kunaka kupinda simba; asi zvakanyadaro ungwaru hwomurombo hunoshoorwa, nemazwi ake aapurutanwi.”

¹⁷ Mazwi akanyarara omunhu wakangwara anopinda kunasa kuzwika kupinda kudaidzira kwouwo unotonga pakati pemapenzi.

¹⁸ Ungwaru hwakanaka kupinda zvokurwa ndizvo hondo, asi mushaishi umwe unoparadza zvakanaka zvakawanda.