Muchu. 7 - Bhaibheri Rakachena muChindau

Mipinimidzo Ngendaa yoKupona

¹ Zina rakanaka rinopinda kunaka kune mafuta anomutengo mukuru, nezuva rokufa rakanaka kupinda zuva rokubarwa.

² Kwakapinda kunaka kuenda kumhatso yechiriro kuno kuenda kumhatso yedhiri; ngokuti aya ndiwo magumo omunhu weshe, nounopona unozochiisa mumwoyo mwake.

³ Kutsumba kwakapinda kunaka kuno kusheka, ngokuti ngokutambudzika kwehope mwoyo unoitwa unodakara.

⁴ Mwoyo wewakangwara uri mumhatso yechiriro; asi mwoyo webenzi uri mumhatso yokudakara.

⁵ Kwakapinda kunaka kuti munhu azwe kukaraidza kwowakangwara kuno kuti azwe kuemba kwemapenzi.

⁶ Ngokuti kudai ngokuputika kweminzwa mumuriro pashi pehari, ndizvo zvakaitawo kusheka kwebenzi; neichiwo achina shwiro.

⁷ Ngegwinyiso kuangiridzwa kunoitisa munhu wakangwara benzi, nokutengera kunoshaishira mwoyo.

⁸ Magumo echiro akapinda kunaka kuno kuamba kwacho; nouwo unotsengerera mumweya wakapinda kunaka kuno uwo unodzikudza mumweya.

⁹ Usakasira kunyangadzwa mumweya, ngokuti ushungu hunogara muditi rebenzi.

¹⁰ Usaronza kuti, “Ngenyi mazuva ekare aiya akapinda kunaka kune mazuva aya?” Ngokuti kubvunza uku akubvi mukungwara.

¹¹ Ungwaru hwakanaka kudai ngenhaka, ndikwo kuuyirwa kweavo vanoona zuva.

¹² Ngokuti kungwaririka kwoungwaru kwakadai ngokungwaririka kwemare, nokuuyirwa kwokuzia ndikwo kuti ungwaru hunopa kupona kwaari unakwo.

¹³ Pinimidza ngomushando waMwari; ndiani ungakona kururamisa icho chaakashongorosa?

¹⁴ Pazuva rokubudirira dakara, nomuzuva rokutambudzika nasa kupinimidza. Mwari ndiye wakaita zuva iro nerimweni, kuti munhu asakona kuzia chiro chinozouya sure kwake.

¹⁵ Zveshe izvi ndakazviona mumazuva angu ezvisina shwiro; uripo munhu wakarurama unofa mukururama kwake, uripozve munhu wakashata, naye unorebesa mazuva okupona kwake mukushata kwake.

¹⁶ Usaita wakarurama kakurutu; usaita wakangwara kakurutu; unodziuraya ngenyi?

¹⁷ Usaita wakashata kakurutu; usaita benzi; ngenyi wechifa isati yaanguva yako?

¹⁸ Zvakanaka kuti ubatisise chimwe, usatendera kuti chibve ngendaa yechimweni; ngokuti uwo unomutya Mwari ndiye unozopokonyoka kubva kwezviri zveshe.

¹⁹ Ungwaru hunogwinyisa vakangwara kupinda vatongi gumi vari mudhorobha.

²⁰ Ngegwinyiso akuna munhu naumwe wakarurama munyika unoita zvakanaka usikashaishi.

²¹ Usapurutana kumazwi eshe anoereketwa, nokuti ungazozwa muranda wako echikutuka.

²² Mwoyo wako unozia kuti nguva zhinji iwewe wakambotuka vamweni.

²³ Zveshe izvi ndakazviedza ngoungwaru; ndakati, “Ndinozoita wakangwara,” asi kwaiya kuretu kubva kwendiri.

²⁴ Icho chiripo chiri kuretu nechakadzama, chakadzama kakurutu; ndiani ungachitsvakisisa pamhene?

²⁵ Ndakakunukudza mwoyo wangu kuti ndizie nokutsvaka nokutsvakisisa kungwara nemazano, kuti ndizie kuti kushata upenzi, noupenzi upengo.

²⁶ Ndakaona chiro chinovava kupinda rufu, ndiye mukadzi uwo uri chirimbana, uwo mwoyo wake murau nemambure, nyara dzake dzakadai ngemanguri; uwo unodakadza Mwari unozopokonyoka kubva kwaari; asi uwo wakashata unozobatwa ndiye.

²⁷ Ringira, ichi ndicho chendakaona, unoronza muchumairi, echitutsira chimwe ngachimwe kuti ndinase kuona gwinyiso razvo,

²⁸ icho mweya wangu wakatsvakisisa ngokuangira, asi andisati ndaona. Ndakaona munhu umwe ega pakati pegumi remazana, asi andizi kuona mukadzi pakati peava veshe.

²⁹ Ringira, ndakaona ichi chega, kuti Mwari wakasika munhu akarurama; asi ivo vakadzirongera mazano akawanda.