Muchu. 6 - Bhaibheri Rakachena muChindau

¹ Kuripo kushata kwendakaona pashi pezuva, kunorema padera pevanhu.

² Munhu uwo unopuwa ndiMwari upfumi, nezvakawanda nokuremeredzwa, kuti asatama nachimwe cheizvo zveshe zvaane danha nazvo, asi Mwari aatenderi kuti adye izvi zviro, asi zvinodyiwa ngomupara. Izvi azvina shwiro; idenda guru rakashata.

³ Kudai munhu echibara vana zana, nokupona makore akawanda, asi azvina ndaa kunyazwi mazuva emakore ake akawanda, kudai mweya wake usikagutiswi ngezvakanaka, nokuti asikatsirwi, ndinoti kuti uwo wakabarwa nguva isati yaguma unopinda kuitanane pane iye.

⁴ Ngokuti wakabarwa asina shwiro, naye unoendazve muchidima, nomuchidima zina rake rinofukidzwa.

⁵ Zve, aazi kumboriona zuva, nokuti kuzia chiro; asi unoona kuzorora kwakanaka kupinda uwo.

⁶ Kunyazwi unopona makore gumi remazana (1,000) akapetwa kairi, asikazi kumbodakara kumboona zvakanaka, avaendi veshe kundau imweyo here?

⁷ Weshe mushando womunhu ngowomuromo wake, asi danha rake arigutiswi.

⁸ Ngokuti wakangwara unenyi kupinda benzi? Nomurombo unenyi uwo unozia kuhamba zvakanaka pamberi pevanopona?

⁹ Kwakanaka kuona ngemadziso kupinda kupepesheka kwokudisisa; izviwo azvina shwiro, kurumbirirana nemhepo.

¹⁰ Chiro cheshe chiripo chakadudzwa zina karetu, nacho chinoziikanwa kuti munhu chiro chakadini, aakoni kuphikisana nouwo unomupinda ngesimba.

¹¹ Mazwi akawandisa kuwandisa kwezvisina shwiro, ndizvo umweni ungapinda kunaka ngenyi?

¹² Ngokuti ndiani unozia chinonakira munhu apo echipona mazuva mashomani okupona kwake kusina shwiro, aanopedza kudai ngebvuri? Ndiani ungamuronzera munhu izvo zvinozoapo ngesure kwake pashi pezuva?