Muchu. 5 - Bhaibheri Rakachena muChindau

Usakasira Kuita Mhiko

¹ Ngwarira tsoka dzako apo wooenda kumhatso yaMwari; kukwedzera pasinde kuti uzwe kunopinda mudiro wapirwa ngemapenzi; ngokuti avazii kuti vanoita zvakashata.

² Usakasira kuereketa ngomuromo wako, usatenderazve mwoyo wako kuti ukasire kuereketa izwi pamberi paMwari, ngokuti Mwari uri mudenga, newe uri padera penyika; ndizvo mazwi ako ngaaite mashomani.

³ Ngokuti kurota hope kunouya ngokuwanda kwemishando; ngokudaro izwi rebenzi rinoziikanwa ngouwandu kwemazwi aro.

⁴ Naapo wechipika mhiko kunaMwari, usanonoka kuripa; ngokuti aadakari ngemapenzi: Ripa icho chowakapika.

⁵ Zvakapinda kunaka kuti usapika mhiko, kuno kuti upike usikazoiripi.

⁶ Usatendera muromo wako kuti ukutungamirire mukushaisha; usaronzazve pamberi penhumwa kuti aiya maposheso; ngenyi Mwari echisisira kunyangadzwa ngemazwi ako, nokuparadza mushando wenyara dzako?

⁷ Ngokuti kurota nemazwi akawanda azvina shwiro; asi iwewe itya Mwari.

Kupona Akuna Shwiro

⁸ Kudai wechiona munyika kutambudzwa kwevarombo nokushaisha kakurutu kwokutonga kwakanaka nekwakarurama, usashamiswa ngeiyo ndaa; ngokuti nduna huru inoringirwa ngowakapinda kukura, asi varipo vakakurisa kuvapinda vanoringirawo padera pavo.

⁹ Ngokuti kuuyirwa kwenyika ngokwavo veshe: mambo emene unorarama ngezveminda.

¹⁰ Mudisi wemare aatongozogutiswi ngemare; nokuti mudisi wepfuma aazogutiswi ngezvaanouyirwa ndizvo. Izviwo azvina shwiro.

¹¹ Apo pfuma yawandiswa, vanowandiswawo vanoidya; nevane vayo vanozodetserwa ngenyi asi kuiona ngemadziso avo?

¹² Hope dzouwo unoshanda dzinotapira, kunyazwi echidya zvishomani nokuti zvakawanda; asi uwandu hwepfuma yemakurudza ahuvatenderi kuti vaate hope.

¹³ Kuripo kushata kukuru kwendaona pashi pezuva, kuti pfuma inongwaririrwa vane vayo kuita kuremadzwa kwavo,

¹⁴ noupfumi uhwo hunoparadzwa ngomushando wakashata; kunyazwi abara mwana, aana chiro munyara yake.

¹⁵ Kudai ngezvaakabuda kubva mundani yamai ake, ndizvo unozohwirirazve ari mutitinini, kudai ngezvaakauya, aazotori chiro kubva kumushando wake, icho chaangatwara munyara mwake.

¹⁶ Ichiwo chiri kushata kukuru, kudai ngezvaakauya ndizvo, unozohwirira akadaro naye unouyirwa ngenyi unoshandira dutu?

¹⁷ Eshe mazuva akezve unodya ari muchidima, naye unokusvipa mwoyo kukurutu, urwere nokutambudzika.

¹⁸ Ichi ndicho chendakaona, kuti chakanaka nokusisira kuti munhu adye nokumwa nokuona kudakara mumushando wake weshe waanoshanda pashi pezuva mazuva eshe okupona kwake, aanopuwa ndiMwari; ngokuti ichi ndicho chikoaniswa chake.

¹⁹ Kumunhu weshe uwo wakapuwa ndiMwari upfumi nezvakawanda, wakamupazve simba rokuti ahudye, nokuashira chikoaniswa chake, nokudakara mumushando wake; ichi ndicho chipo chaMwari.

²⁰ Ngokuti aazonyanyi kupinimidza ngemazuva okupona kwake, ngokuti Mwari unomuita kuti abatike ngokudakara kwomwoyo wake.