Muchu. 4 - Bhaibheri Rakachena muChindau

¹ Zve, ndakaona kutambudzwa kweshe kunoitwa pashi pezuva. Ringira masodzi eavo vanotambudzwa, navo vasina muembedzeri; kurutii rwevatambudzi vavo raiyapo simba; navo vasina muembedzeri.

² Neni ndakapinimidza vakafa, avo vakatofa kuti varinane kupinda vanopona vachazwa;

³ asi urinane kupinda veshe, uwo usikazi kumboapo, neusikazi kuona mushando wakashata unoitwa pashi pezuva.

⁴ Zvino, ndakaona kushanda kweshe, noungwazi hweshe mumushando unobva kumunhu umwe ngokuemura kwake munhu umweni. Izviwo azvina shwiro, ndikwo kurumbirirana nemhepo.

⁵ Benzi rinofumbata nyara dzaro, nokudya nyama yaro yemene.

⁶ Tsimba imwe pane kunyarara yakapinda kunaka pane kuwa netsimba mbiri panokurwadziwa nokurumbirira mhepo.

⁷ Zve, ndakaona azvina shwiro pashi pezuva.

⁸ Uripo umwe unogara ega, usina wechipiri; aana mwana nokuti hama; asi mushando wake auna magumo, nemadziso ake aagutiswi ngepfuma. “Ndiani wendinofira kushandira,” wakabvunza, “Ndechinyima mweya wangu zvinodakadza?” Izviwo azvina shwiro, nomushando usikadakadzi.

⁹ Vairi varinane kupinda umwe, ngokuti vanomuthuso wakanaka womushando wavo.

¹⁰ Ngokuti kudai vechiwa, umwe unomirudza mungani wake; asi ihehe kwaari uri ega apo echiwa, ngokuti aana umweni unomumirudza.

¹¹ Zve, kudai vairi vechiata pamwepo, vanodziisana; asi umwe ungaita madziirwenyi ega?

¹² Kunyazwi umwe anganyisa umweni, vairi vanozonyisa umwe. Tambo nhatu dzakakoshwa pamwepo adzikasiri kudambuka.

¹³ Mudoko murombo wakangwara urinane kupinda mambo musharuka uri benzi usikachatendi kupangwa.

¹⁴ Umwe ngegwinyiso ungakona kubuda kubva mutirongo kupinda muumambo, kunyazwi muumambo hwake wakabarwa ari murombo.

¹⁵ Ndakaona veshe vanopona avo vanohamba pashi pezuva, vechiteera mudoko wechipiri uwo unozogara pandau yamambo.

¹⁶ Kwaiya kusina magumo kuvanhu veshe, avo vaakatungamirira. Asi avo vanozoteera sure kwake avazodakari ndiye. Ngegwinyiso izviwo azvina shwiro, ndikwo kurumbirirana nemhepo.