Muchu. 3 - Bhaibheri Rakachena muChindau

Chiro Cheshe Chinenguva yacho

¹ Chiro cheshe chinenguva, nomukuwo kumishando yeshe iri pashi pedenga:

² Mukuwo wokubarwa, nomukuwo wokufa; mukuwo wokusima, nomukuwo wokukukura izvo zvakasimwa;

³ mukuwo wokuuraya, nomukuwo wokurapa; mukuwo wokupwanyira pashi, nomukuwo wokuaka;

⁴ mukuwo wokuchema, nomukuwo wokusheka; mukuwo wokutsumba, nomukuwo wokuzvina;

⁵ mukuwo wokuposhera mapuwe, nomukuwo wokuunganidza pamwepo mapuwe; mukuwo wokufungatira, nomukuwo wokureka kufungatira;

⁶ mukuwo wokutsvaka, nomukuwo wokurashikirwa; mukuwo wokungwarira, nomukuwo wokukwitikwidza;

⁷ mukuwo wokubaura, nomukuwo wokusona; mukuwo wokuti mwii, nomukuwo wokuereketa;

⁸ mukuwo wokuda, nomukuwo wokuzonda; mukuwo wehondo, nomukuwo wokunyarara.

⁹ Unouyirwa ngenyi unoshanda kubva kuneizvo zvaanoshanda?

¹⁰ Ndaona mishando yaakapa Mwari kumunhu weshe kuti ashande kweiri.

¹¹ Wakaita kuti chiro cheshe chiite chinonakira nguva yacho; zve, wakaisa mupinimidzo wokuzia zvekaretu nezvichauya mumwoyo mwake, asi apana munhu ungakona kuzwisisa mushando waakaita Mwari kubvira mukutanga metsa kumagumo.

¹² Ndinozia kuti akuna chiro chakanaka kwevari chingapinda kuti vadakare nokuita zvakanaka mukupona kwavo.

¹³ Zve, ichi chipo chaMwari kuti munhu weshe adye nokumwa, nokudakara mumushando wake weshe.

¹⁴ Ndinozia kuti kunyazwi chiinyi chaanoita Mwari chinogara mhera nariini; apana chingatutsirwa kwechiri, nokuti chiro chingaduswa kubva kwechiri; Mwari wachiita ichi kuti veshe vaeme vechitya pamberi pake.

¹⁵ Chindoripo chaiyapo; neicho chinozoapo chindoripo; naMwari unotsvaka icho chapinda.

Kutonga Kusikazi Kururama muNyika

¹⁶ Padera pezviro zveshe, ndakaona pashi pezuva kuti mundau yokutonga kwakarurama kushata kwaiyapo, nokundau yokururama kushaisha kwaiyapowo.

¹⁷ Ndakati mumwoyo mwangu, “Mwari unozotonga vakarurama nevakashata, ngokuti wakaemesa mukuwo wechiro cheshe newomushando weshe.”

¹⁸ Ndakati mumwoyo mwangu ngendaa yevanhu, kuti Mwari unovaedza kuti vaone kuti ivo vemene imhuka.

¹⁹ Ngokuti icho chinoitika kuvanhu nechinoitikawo kumhuka chakatodzana; kufa kwechimwe ndikwo kufa kunoita chimweni. Eya, zveshe zvinofema mweya umwewo; nomunhu aana chaanopinda mhuka ndicho; ngokuti zveshe azvina shwiro.

²⁰ Zveshe zvinoenda kundau imweyo; zveshe zvinobva mubukuta, zveshe zvinohwirirazve kuita bukuta.

²¹ Ndiani unozia kuti mweya womunhu unokwira mudenga, nomweya wemhuka unodzaka pashi mumavhu?

²² Ndizvo ndakaona kuti akuna chiro chakapinda kunaka kuno kuti munhu adakare ngomushando wake, ngokuti icho ndicho chikoaniswa chake. Ndiani ungakona kumuunza kuti azie zvinozoitika sure kwake.