Muchu. 2 - Bhaibheri Rakachena muChindau

¹ Ndakati kumwoyo wangu, “Uya, ndinozoita kuti ndiedze kudakara, ndidakadzwe pachangu.” Asizve, izviwo azvina shwiro.

² Ndakati ngendaa yokusheka, “Kupenga,” ngokudakara, “Kunodetserenyi?”

³ Ndakatsvaka mumwoyo mwangu njira yokudzidakadzisa ndiyo ngevhini, mwoyo wangu wechinditungamirira ngoungwaru; nenjira yokubata ndiyo upenzi, metsa ndaona kuti chiinyi chakanakira vanhu, kuti vaite pashi pomudenga pamazuva avo mashomani okupona kwavo.

⁴ Ndakaita mishando mikuru; ndakadziakira mhatso; ndakadzisimira minda yemivhini.

⁵ Ndakadzinasirira minda neminda yemiti yemichero, ndakasimemwo miti yembeu dzeshe dzemichero.

⁶ Ndakadziitira makandwa emvura, okudiridzira makwasha anokura miti.

⁷ Ndakatenga hloko vamuna nevakadzi, ndine hloko dzakabarwa mumhatso mwangu; ndaiyawo noupfumi hwakawanda hwezvifuyo zvakawanda zven'ombe nezvemakwai, kupinda munhu weshe waiya pamberi pangu muJerusarema.

⁸ Ndakadziunganidzirawo sirivha nomukore, noupfumi hwemadzimambo nehwenyika; ndakadzitorera vaembi, vamuna nevakadzi, neizvo zvinodakadza vanhu, nemabunha akawanda.

⁹ Ndizvo ndakaita mukuru, ndakaita mukuru kupinda veshe vakatanga pamberi pangu muJerusarema; noungwaru hwanguwo hwakandogara neni.

¹⁰ Kunyazwi ngechiri chaakadisisa madziso angu, andizi kupinga mwoyo wangu kubva kwechiri; andizi kurambidza mwoyo wangu kubva mukudakara kwangu kweshe, ngokuti mwoyo wangu wakaona kudakara mumishando yangu yeshe, neizvi zvaiya chikoaniswa changu kunemishando yangu yeshe.

¹¹ Zvino ndakapinimidza ngemishando yeshe yaiya yaitwa ngenyara dzangu, nemishando yeshe yendakaita ngokutambudzika, ringira, zveshe zvaiya zvisina shwiro, nokurumbirirana nemhepo, akuna kuuyirwa pashi pezuva.

¹² Ndizvo ndakadzikunukudza kupinimidza ngoungwaru, upengo noupenzi; ngokuti chiinyi chingaitwa ngouwo unoteera mambo? Kwega izvo zvakaitwa ngepamberi.

¹³ Zvino ndakaona kuti kungwara kunopinda upenzi kudai ngokujeka kunopinda chidima.

¹⁴ Munhu wakangwara une madziso musoro rake; asi benzi rinohamba muchidima. Asi ndakaonazve kuti ngozi imweyo inovagumira veshe.

¹⁵ Zvino ndakati mumwoyo mwangu, “Icho chinoitika kunebenzi, chinozoitikawo kwendiri; ndizvo ndakapinda kungwara ngokuitawani?” Ndakati mumwoyo mwangu, “Izviwo azvina shwiro.”

¹⁶ Ngokuti akuna kucherechedzwa kunogara mhera nariini, kwowakangwara nokuti kwebenzi, kwechioneka kuti mumazuva anouya veshe variyarikanwa. Munhu wakangwara unokona kufawo ngenyi kudaiwo ngebenzi?

¹⁷ Ndizvo ndakazonda kupona, ngokuti mushando unoitwa pashi pezuva unondisvipidza mwoyo; ngokuti zveshe azvina shwiro, kurumbirirana nemhepo.

¹⁸ Ndakazonda mushando wangu weshe wendakashanda pashi pezuva, ngokuti ndinosisira kuusiira munhu unozoteera sure kwangu.

¹⁹ Ndiani unozia kuti pamweni unozoita munhu wakangwara nokuti benzi? Asi unozotonga padera pomushando wangu weshe wendakaita nokushandisa ungwaru hwangu pashi pezuva. Neizviwo azvina shwiro.

²⁰ Ndizvo ndakakunukuka ndikaita kuti mweya wangu upere simba ngendaa yomushando weshe wendakashanda pashi pezuva,

²¹ ngokuti nguva dzimweni munhu uwo wakashanda mushando wake ngesimba mukungwara nomukuzia, nomuungwazi, unosisira kusiya zveshe kuti zvidyiwe ngoumweni munhu usikazi kuzvishandira. Izviwo azvina shwiro, nokushata kukuru.

²² Munhu unozouyirwa ngenyi kubva mukushanda kweshe nokurembeswa ngokushanda kwaanoshanda pashi pezuva?

²³ Ngokuti mazuva ake eshe akazara ngokurwadziwa, nomushando wake unotambudzisa; kunyazwi nousiku mwoyo wake auzorori. Izviwo azvina shwiro.

²⁴ Akuna chiro chakanaka kunomunhu kupinda kudya nokumwa, nokuti mweya wake udakare mukunaka kwomushando wake. Ichiwo ndakaona kuti chakabva munyara yaMwari,

²⁵ ngokuti ngepabanze pake ndiani ungadya nokuti kudakara?

²⁶ Ngokuti kwaari uwo unomudakadza Mwari unopa ungwaru, kuzia nokudakara; asi kumushaishi unopa mushando wokuunganidza, nokuita murwi, unopa kwega kunouwo unomudakadza Mwari. Izviwo azvina shwiro, kurumbirirana nemhepo.