Muchu. 12 - Bhaibheri Rakachena muChindau

¹ Karakadza Musiki wako ngemazuva outsva hwako, mazuva akashata asati aguma, nemakore akwedzera pasinde apo pounozoti, “Andina kudakara mwaari;”

² apo zuva, kujeka, mwedzi nenyeredzi, zvisati zvadzimwa, nemakore apetuka ngesure kwokunaya kwemvura;

³ muzuva apo vangwariri vemhatso vanohuta, nevamuna vanesimba vanokotamiswa, nezvigayo zvinorekera kushanda ngokuti zvaa zvishomani, naavo vanoringira ngepamafasitera vanoona mazweezwee;

⁴ naapo misiwo yemupato yakonywa, nokurira kwechigayo kwatsonga, noumweni unomiruka ngokurira kweshiri, nevanasikana veshe vokuemba vanonyaradzwa;

⁵ naapo echityiswa ngendau dzakakwirira, nokutyisa kurimwo munjira; muti wearimondi unozoburukira, nendongwe inodzikweyapo, nemadanha anopera; ngokuti munhu weshe unosisira kuenda kanyi kwake mhera nariini, nevachemi vanozopararira mupato;

⁶ isati yadambuka tambo yesirivha, nendiro yomukore isati yaputswa, nejomeya risati raputswa pachinyuka, nevhiri risati raguka pamupisi,

⁷ nebukuta rinohwirira kubukuta kudai ngezveraiya rakaita, nomweya unozohwirira kunaMwari uwo wakaupa.

⁸ Hazvina shwiro, hazvina shwiro, unoronza muchumairi, zveshe azvina shwiro.

Mazwi oKupedzisira

⁹ Ngepabanze pokungwara, muchumairi wakadzidzisa vanhu kuzia, kupima, kudzidzira nokuronga zvisana zvakawanda.

¹⁰ muchumairi wakaedza kutsvaka kuona mazwi anodakadza, naye wakanyora zvakarurama mazwi egwinyiso.

¹¹ Mazwi evakangwara akadai ngehoko dzinopinza, nokudai ngezvipikiri zvakagwinyiswa ngevaunganidzi vemazwi, anopuwa ngomuushi umwe.

¹² Panezveshe kupinda izvi, mwana wangu, ngwara. Kuita mabhuku mazhinji akuna magumo, nokudzidzira kwakawanda kunorembesa muiri.

¹³ Kupera kwendaa; kuzwika kwayo yeshe: Itya Mwari, ungwarire zvironzo zvake; ngokuti uyu ndiwo mushando weshe womunhu.

¹⁴ Ngokuti Mwari unozounza mishando yeshe mukutongwa, nechiro cheshe chakafishika, chakanaka nokuti chakashata.