Muchu. 11 - Bhaibheri Rakachena muChindau

Chinoitwa ngoMunhu Wakangwara

¹ Kandira chingwa chako mumvura, ngokuti ngesure kwemazuva mazhinji unozochionazve.

² Ipa chikoaniswa kuvanomwe, nokuti kuvasere, ngokuti auzii kushata kungaapo padera penyika.

³ Naapo makore azara ngemvura anoidurura padera penyika; nokudai muti wechiwa wakaringira kubani, nokuti wechiwira dera, pandau powawira muti ndipo pounoata.

⁴ Kunyazwi ndiani unorinda mhepo aazokushi; nokunyazwi ndiani unoringisisa makore aazokukuri.

⁵ Kudai ngezveusikazii njira younouya ndiyo mweya kumagodo mundani yamai vaane mimba, ndizvo auzii mushando waMwari uwo unoita zveshe.

⁶ Kusha mbeu dzako mangwanani, nemadeekoni usarekera nyara yako yakagara; ngokuti auzii kuti ngechiri chinozobudirira, ichi nokuti icho, nokuti zveshe zvakatodzana zvinozonaka.

⁷ Kujeka kunotapira, zvinodakadza madziso kuona zuva.

⁸ Kunyazwi avo vanorarama makore mazhinji, vanosisira kudakara mwaari eshe; asi ngavakarakadze kuti mazuva echidima anozowanda. Zveshe izvo zvinouya azvina shwiro.

Kupangwa kweVanhu Vatsva

⁹ Dakara iwewe jaha, muutsva hwako; mwoyo wako ngaukudakadze ngamazuva outsva hwako. Hamba ngenjira yomwoyo wako, nomukuona kwemadziso ako, asi zia kuti ngendaa yeizvi zviro zveshe Mwari unozokuunza mukutongwa.

¹⁰ Bvisa kukakaseka kubva mumwoyo mwako, ubvise kurwadziwa kubva mumuiri wako; ngokuti uhwana noutsva azvina shwiro.