Muchu. 10 - Bhaibheri Rakachena muChindau

¹ Nhunzi dzakafa dzinoita kuti mafuta okudzora omunasiri anuhwe; ndizvo upenzi hudoko hunorema kupinda ungwaru nokuremeredzwa.

² Mwoyo womunhu wakangwara unotseyama kunyara yake yokumudyo, asi mwoyo webenzi unotseyama kunyara yake yokumuoshwe.

³ Kunyazwi apo benzi rechihamba munjira, rinotama ungwaru nokuonisa vanhu veshe kuti ibenzi.

⁴ Kudai ushungu hwomutongi hwechikumukira, usasiya ndau yako, ngokuti kudzipfaisa kunonyaradza ndaa hurutu.

⁵ Kuripo kushata kukuru kwendakaona pashi pezuva, kupauka kwakakura kudai ngokunobuda kubva kumutongi:

⁶ Upenzi hunogadzikwa mundau zhinji dzakakwirira, negurudza rinogara kundau dziri pashi.

⁷ Ndaona hloko dzechigadha mahachi, nevazvare vechihamba pashi ngetsoka kudai ngezvinoita hloko.

⁸ Kunyazwi ndiani unotsa hunza unozowira mukati mwayo; nouwo unoputsa rukumbati, unozorumwa ngenyoka.

⁹ Kunyazwi ndiani unoputsa mapuwe unozokuvadzwa ndiwo; nokunyazwi ndiani unoadza huni unozoona nyatwa ndidzo.

¹⁰ Kudai simbi yokushanda ndiyo isikapinzi, nomunhu asikairodzeri upanga hwayo, zvino kunosisira kuti aishandise ngesimba rakapinda kukura; asi ungwaru hunomudetsera kuti abudirire.

¹¹ Kuti nyoka ikaruma isati yafumhwa, apana kuuyirwa kunemufumhi.

¹² Mazwi anoereketwa ngewakangwara anounza kuremeredzwa, asi miromo yebenzi inoritangurira.

¹³ Mazwi omuromo waro anoambira muupenzi nokuereketa kwaro kunogumira mukupenga kwakashata;

¹⁴ asi benzi rinowanza mazwi. Akuna naumwe ungazia zvinoda kuitika; ndiani ungakona kuronzera umweni zvichazoapo?

¹⁵ Kushanda kwebenzi kunorirembesa, ngokuti arizii nenjira yokuenda kudhorobha.

¹⁶ Ihehe iwewe, A nyika, apo mambo wako achiri mwana, nenduna dzako dzechidya dhiri mangwanani!

¹⁷ Unomuchena, iwewe nyika, kudai mambo wako ari mukororo wevanembiri, nenduna dzako dzechidya ngomukuwo wakasisira, kuti vaone simba, haiwa kuti varadze.

¹⁸ Kubudikidza nenungo denga remhatso rinotsakara, kubudikidza ngenungo mhatso inodonha.

¹⁹ Dhiri rinoitirwa kudakara, nevhini rinoitirwa kudakadzwa, nemare inokwanisa izvo zveshe zvinodiwa.

²⁰ Usatuka mambo, kunyazwi nomupinimidzo wako, nokuti kutuka makurudza kunyazwi uri mukamera rako rokuata: ngokuti shiri yomudenga inozotwara mazwi ako, nokuti icho chinemaphaphiro chinozoteketesa ndaa.