Muchu. 1 - Bhaibheri Rakachena muChindau

Ndaramo Ayina Shwiro

¹ Mazwi omuchumairi, mukororo waDhavhidha, mambo muJerusarema.

² Hazvina shwiro, hazvina shwiro, unoronza muchumairi, hazvina shwiro, hazvina shwiro! Zveshe azvina shwiro.

³ Unodetserwa ngenyi munhu ngemishando yake yeshe yaanoshanda pashi pezuva?

⁴ Mubarirwana unopinda, kwechiuya mubarirwana umweni, asi nyika inogara iripo.

⁵ Zuva rinobuda nezuva rinopota, rechikasira kuenda kundau yerinobudira.

⁶ Dutu rinovhuvhuta kuenda kubani, rechiuya kutenderera kuenda dera; rinotenderera nokutenderera rechienda, dutu rinohwirirazve kudai ngokutenderera kwaro.

⁷ Ndwizi dzeshe dzinoerera kupotera muruandhle, asi ruandhle arutongozari; kundau yedzinoerera dzechibva ndwizi dzinopetukazve.

⁸ Zviro zveshe zvinogomera kakurutu; munhu aakoni kuzvironza; dziso arigutiswi ngokuona, nenzee aizari ngokuzwa.

⁹ Icho chaiyapo chinondozoapozve; neicho chaitwa ndicho chinondozoitwa; akuna chiro chitsva pashi pezuva.

¹⁰ Chiripo here chiro chingaronzwa ndicho kuti, “Wona, ichi chiro chitsva?” Chaiya chindoripo mukuwo wekare, chakatitangira tisati taapo.

¹¹ Vanhu vekaretu avakarakadzwi nokuti kunozoapo kukarakadzwa kwevanhu vachauya ngaavo vachauya sure kwavo.

Zvinoziikanwa ngoMungwaru

¹² Inini muchumairi ndaiya mambo padera peIsuraeri muJerusarema.

¹³ Ndakazvipira mwoyo wangu kutsvaka nokutsvakisisa ngokungwara shwiro yeizvo zveshe zvinoitwa pashi pedenga; uyu mushando unosvipidza mwoyo waakapa Mwari kuvanhu kuti vatambudzike ndiwo.

¹⁴ Ndakaona mishando yeshe inoitwa pashi pezuva; ringirai, yeshe ayina shwiro kurumbirira mhepo.

¹⁵ Icho chakashongoroka achingaitwi kuti chirurame, neizvo zvisipo azvingaerengwi.

¹⁶ Ndakati kumweya wangu, “Ringira, ndaona ungwaru hwakakura, kupinda avo veshe vaiya pamberi pangu muJerusarema; mwoyo wangu waiya wakaona kungwara nokuzwisisa kukurutu.”

¹⁷ Neni ndakapira mwoyo wangu kuti ndizie ungwaru, nokuzia zvoupengo nezvoupenzi. Ndakaonazve kuti izvi kurumbirirana nemhepo.

¹⁸ Ngokuti muungwaru hwakawanda kusvipa mwoyo kukurutu kurimwo, nouwo unowanza ungwaru unodziwanzira kutambudzika.