Mik. 7 - Bhaibheri Rakachena muChindau

Isuraeri Zviito zvake Zvakaora

¹ Ihehe kwendiri! Ngokuti ndakadai ndivo vanotsvaka michero yepazienza apo yapera kuunganidzwa, naapo zvimavhini zvinosara zvapera kukaiwa, akuna chikore chokudya; apana maonde aibva okutanga endinodisisa.

² Munhu wakagondeka wakafa kubva panyika, akuna wakarurama naumwe wakasara; veshe vanogarira kuparadza ngazi, vanovhimana umwe noumweni wake ngemambure.

³ Nyara dzavo ingwazi kuita zvakashata; mukuru nomutongi vanokumbira fumha muromo; nounesimba unoronza zvaanokarira mumwoyo wake; ndizvo vanofukidza kutonga kwakanaka.

⁴ Uwo wakapinda kunaka kwevari wakadai ngorukato, nouwo wakapinda kururama wavo rushosha rweminzwa. Zuva rokurinda kwavo nerokuororwa ravo rauya; zvino kwaapasinde kukangaidzwa kwavo.

⁵ Musagonda mungani, musaisa gonda renyu kune unodikanwa; ngwarira misiwo yomuromo wako kubva kunouwo unoata paditi rako.

⁶ Ngokuti mukororo aaremeredzi baba, mwanasikana unomukira mai ake, muzakazi mazvarira ake; magaa omunhu ndivo avo vemhatso yake yemene.

⁷ Asi inini, ndinozoringira kunaMambo Mwari, ndinozogarira Mwari woruponeso rwangu; Mwari wangu unozondizwa.

Mambo Mwari Unounza Ruponeso

⁸ Usadakara ndini, O gaa rangu; apo pendinowa pashi, ndinozomiruka; apo ndechigara muchidima, Mambo Mwari unozoita kujeka kwendiri.

⁹ Ndinozotwara ushungu hwaMambo Mwari, ngokuti ndakashaisha kwaari, metsa andirwira ndaa yangu nokundiunzidzira. Unozondiunza mukujeka, neni ndinozoona kururama kwake.

¹⁰ Zvino gaa rangu rinozoona, nokutsveruka kunozomufukidza uwo wakati kwendiri, “Uripari Mambo Mwari, Mwari wako?” Madziso angu anozomuona pakuwa kwake; zvino unozotsikwatsikwa pashi kudai ngemadhaka emapato.

¹¹ Zuva rokuaka marukumbati ako! Muzuva iro mugano unozobviswa kuiswa kuretu.

¹² Muzuva iro vanozouya kwouri kubva Asiria, nokubva kumadhorobha eEgipite, metsa kuRwizi, kubva kuruandhle kuguma kuruandhle, nokubva kumutunhu kuguma kumutunhu.

¹³ Asi nyika inozoita dongo ngendaa yevagari vayo, ngendaa yemichero yezviito zvavo.

Nyasha dzaMambo Mwari padera paIsuraeri

¹⁴ Usha vanhu vako ngendonga yako, mutanga uwo uri nhaka yako, uwo unogara uri wega mugwasha, pakati pemunda wenyika; ngavadye muBhashani nomuGireadhi, kudai ngemazuva ekaretu.

¹⁵ Kudai ngemumazuva okubuda kwako munyika yeEgipite ndichavaonisa zviro zvinoshamisa.

¹⁶ Madzinza anozoona nokutsveruka ngesimba ravo reshe; vanozoisa nyara dzavo pamiromo yavo, nzee dzavo dzinozoita madziiranzee.

¹⁷ Vanozonambura bukuta kudai ngenyoka, kudai ngezviro zvinotamanda zvenyika; vanozouya vechihuta kubva mumasvingo avo; vachapetuka mukutya Mambo Mwari, Mwari wedu, vanozoema mukutya iwewe.

¹⁸ Ndiani Mwari wakadai ndiwe, unokungurira kushata, echidarika padera pendaa yevakasara venhaka yake? Aagari noushungu hwake mhera nariini, ngokuti unodakara ngokuitira nyasha.

¹⁹ Uchatiitirazve nyasha; unozotsikatsika zvishaishi zvedu pashi petsoka.Unozokandira zvishaishi zvedu zveshe mukudzama kworuandhle.

²⁰ Unozoonisa gwinyiso kunaJakobe nenyasha dzinorudo kunaAbrahama, kudai ngezvewakapikira madzibaba edu kubvira kumazuva ekare.