Mik. 6 - Bhaibheri Rakachena muChindau

Ndaa yaMambo Mwari yaAnoitira Isuraeri

¹ Izwai zvinoronza Mambo Mwari: “Mirukai, mupote ndaa yenyu pamberi pemitunhu, nezvimitunhu ngazvizwe izwi renyu.

² Izwai, imwimwi mitunhu, ndaa yaMambo Mwari, neimwimwi madzeyo akagwinya enyika; ngokuti Mambo Mwari unendaa nevanhu vake, unozophikisana naIsuraeri.

³ O vanhu vangu, ndaitenyi kwomuri? Ndamurembesa ngokudini? Ndipingure!

⁴ Ngokuti ndakamukwidza kubuda munyika yeEgipite, ndakamuripira kubva kumhatso youhloko; ndakatuma pamberi penyu Mosi, Aroni naMiriamu.

⁵ O vanhu vangu, karakadzai zvino chaakaronga Bharaki mambo weMoabhi, chiinyi chaakapingura kwaari Bharamu mukororo waBheo, chiinyi chakaitika kubva Shitimu kuguma Girigari, kuti muzie zviito zvinoponesa zvaMambo Mwari.”

Zvinodiwa ndiMambo Mwari

⁶ Ndinozouya nenyi pamberi paMambo Mwari, nokudzikotamisa pamberi paMwari Uri-padera-pazveshe? Ndinozouya pamberi pake nemibairo inopishwa here, ndine makonyana aane gore?

⁷ Mambo Mwari unozodakara ngemakumi emazana emagondohwe here, nokuti ngendwizi dziri gumi remakumi emazana dzemafuta? Ndinozopira dangwe rangu here ngendaa yezvipauko zvangu, muchero wokutanga womuiri wangu ngendaa yokushaisha kwomwoyo wangu?

⁸ Wakuronzera iwewe, O mukororo womunhu, icho chakanaka; Mambo Mwari unodenyi kwouri, kwega kuita zvakarurama, nokuda nyasha, nokuhamba ngokudzipfaisa naMwari wako?

⁹ Izwi raMambo Mwari rinodaidzira kudhorobha, (Ungwaru hwakanaka kutya zina rako): “Izwai, O dzinza, nembungano yedhorobha!

¹⁰ Ndingakona kuriyarwa upfumi hwokushata huchimwo mumhatso mwevakashata, nechipimo chinobira, icho chakatukwa here?

¹¹ Ndinozotendera zvipimo zvakashata, nyede dzinesimbi dzokupima dzinochengedzera here?

¹² Makurudza enyu akazara ngokugebenga, vanogaramwo vakaereketa manyepo, norurumi runochengedzera mumiromo yavo.

¹³ Ndizvo ndatanga kukuchaira pashi kuti uite dongo ngendaa yezvishaishi zvako.

¹⁴ Unozodya, asi auzoguti; kunozoapo kun'en'enwa ngenzara mukati mwako; newe unozotutira, asi azvizongwaririki; neicho chounongwarira ndinozochipira kushoti.

¹⁵ Unozokusha, asi auzocheki; unozotsikatsika maorivhi, asi auzodzidzodzi ngemafuta; unozotsikatsika mavhini matsva, asi auzomwi vhini.

¹⁶ Ngokuti wakangwarira zviemeso zvaOmuri, nemishando yeshe yemhatso yaAhabhi, newe wateera mipango yavo. Ndizvo ndinozokuita matongo, nevagari vemwo kuti vaite vashoorwi; ndizvo unozotwara chimene chevanhu vangu.”