Mik. 5 - Bhaibheri Rakachena muChindau

¹ “Zvino watendenedzwa ngorukumbati; rukumbati rwaemeswa kurwa nesu; ngendonga vanochaya mutongi waIsuraeri padama.

Mwari Unogondisa Mutongi Kubva Bhetherehema

² “Asi iwewe, Bhetherehema Efratha, umwe wemadzinza madoko aJudha, kubva kwouri unozondibudira umwe unozoita mutongi muIsuraeri, uwo maambo ake ngeekaretu, kubva kumazuva ekaretu.”

³ Ndizvo unozovarekera, metsa mukuwo apo uwo unobereka abereka; naapo hama dzake dzakasara dzinozohwirira kuvanhu vaIsuraeri.

⁴ Naye unozoema kugutisa makwai ake ngesimba raMambo Mwari, muuthende hwezina raMambo Mwari, Mwari wake. Navo vanozogara ngokungwaririka, ngokuti zvino unozoita mukuru metsa kumagumo enyika;

⁵ naye unozoita umwe wokunyarara. Kudai vaAsiria vechipotera munyika mwedu nokuzotsika mungome dzedu, tinozovamusira vaushi vanomwe kurwa navo, nevanhu vasere vakaemeswa kuita vatongi.

Kununurwa noKuororwa

⁶ Vanozotonga nyika yeAsiria ngeshoti, nenyika yaNimirodhi ngeshoti yakabeurwa kumisiwo yayo; unozotinunura kubva kuvaAsiria, kudai vechiuya munyika mwedu, nokuti kutsika pakati pemigano yedu.

⁷ Zvino vakasara vaJakobe vakatendenedzwa ngevanhu vakawanda vanozodai ngebeto rinobva kunaMambo Mwari, kudai ngegukura mbuwa padera pomwenje, risikaemeri munhu, nokuti kugarira vakororo vevanhu.

⁸ Nepakati pemadzinza vakasara vaJakobe vakatendenedzwa ngevanhu vakawanda, vanozodai ngemhondoro iri pakati pemhuka dzomugwasha, kudai ngemhondoro itsva iri pakati pemitanga yemakwai, iyo, apo yechihamba ngepakati, inotsikatsika pashi nokubaura kuita zvigurwa, pasina naumwe unganunura.

⁹ Nyara yenyu inozomirudzwa padera pemagaa enyu, nemagaa enyu eshe anozogurwa.

¹⁰ “Muzuva iro,” unoronza Mambo Mwari, “Ndinozouraya mahachi enyu kubva pakati penyu, neni ndinozoputsa ngoro dzenyu;

¹¹ neni ndinozoparadza madhorobha enyika yenyu, nokuriga pashi ngome dzenyu dzeshe dzakagwinya.

¹² Ndinozobvisa kukamba kubva munyara yenyu, nemwi amuchazowi neman'anga;

¹³ neni ndinozogura miedzaniso yenyu yakatsetswa nesika dzenyu kubva pakati penyu; nemwi amuchazodiri mushando wenyara dzenyu;

¹⁴ neni ndinozobvita sika dzenyu dzokudira kubva pakati penyu nokuparadza madhorobha enyu.

¹⁵ Nomukunyangadzwa nomuushungu ndinozounzidzira padera pemadzinza, awo asikazi kupurutana.”