Mik. 3 - Bhaibheri Rakachena muChindau

Mikha Unophikisa Vatungamiriri vaIsuraeri

¹ Neni ndakati, “Izwai, imwimwi vakuru vaJakobe, nevatongi vemhatso yaIsuraeri! Amusisiri kuzia kutonga kwakanaka here?

² Imwimwi munonyenya kunaka, mwechida kushata; munokwamura ganda revanhu vangu, nenyama kubva kumagodo avo;

³ munodya nyama yevanhu vangu, nokuvhiya ganda ravo kubva kwevari; munogura magodo avo kuita zvigurwa, nokuvatemera kudai ngenyama yaiswa muhari, nokudai ngenyama mukati mwebhodha.”

⁴ Zvino vanozochema kunaMambo Mwari, asi aazovapinguri; unozofisha hope yake kubva kwevari ngouwo mukuwo, ngokuti vakaita zvakashata muzviito zvavo.

⁵ Izvi ndizvo zvinoronza Mambo Mwari ngendaa yevaprofeti vanopausa vanhu vangu avo vanodaidzira kuti, “Kunyarara,” apo vanacho chokudya, asi vanonasirira kurwa hondo naavo vasina chevanoisa pamiromo yavo.

⁶ “Ndizvo usiku hunozouya kwomuri, musina chioniso; nechidima kwomuri, musina kuoneswa. Zuva rinozodzaka pashi padera pevaprofeti, zuva rinozosvipa padera pavo.

⁷ Vaoni vanozopedzwa simba, nevafemberi vanozotsverudzwa; veshe vanozofukidza miromo yavo, ngokuti akuna mupinguro wabva kunaMwari.”

⁸ Asi ndini ndakazara ngesimba noMweya waMambo Mwari, nokutonga kwakanaka nokugwinya, kuziisa kunaJakobe kupauka kwake, nokunaIsuraeri kushaisha kwake.

⁹ Izwai ichi, imwimwi vakuru vemhatso yaJakobe nevatongi vemhatso yaIsuraeri, vanonyenya kutonga kwakanaka, vanopaukisa kururama kweshe;

¹⁰ vanoaka Zioni ngengazi neJerusarema ngokushata.

¹¹ Vakuru varo vanotonga ngokutengerwa, vapristi varo vanodzidzisa ngomusharo, vaprofeti varo vanoprofeta ngokuona mare; asi vanotseama kunaMambo Mwari vechiti, “Ngegwinyiso Mambo Mwari unesu! Akuna kushata kungatigumira.”

¹² Ndizvo ngendaa yenyu Zioni rinozorimwa kudai ngomunda, neJerusarema rinozoita mirwi yematongo, nomutunhu wetemperi kudai ngendau dzakakwirira dzegwasha.