Mik. 2 - Bhaibheri Rakachena muChindau

Magumo eAvo Vanotambudza Varombo

¹ Ihehe kwevari vanoronga zvakashata nokushanda zvakashata pamibhedhi yavo! Apo mangwanani oojeka, vanozviita, ngokuti zviri pashi pesimba renyara dzavo.

² Vanoemura minda, nokuibvuka; mhatso, vechidzitora; vanotambudza munhu nemhatso yake, munhu nenhaka yake.

³ Ndizvo izvi ndizvo zvinoronza Mambo Mwari: “Zvino ringira, ndiri kurongera zvakashata mhatso iyi zveisikazokoni kudusa mitsipa yenyu; amuzohambi ngokudzikudza, ngokuti uyu unozoita mukuwo wakashata.

⁴ Ngeiro zuva umwe unozotora muedzaniso ndiwe, nokuchema ngokuchema kwakakura echiti, ‘Taparadzwa yaamho; wakatsandudza chikoaniswa chevanhu vangu; wakachiita mabvisirenyi kubva kwendiri! Pakati pevamukiri vedu akakoanisa minda yedu!’ ”

⁵ Ndizvo akuzoapo naumwe unokandira bote rokupima ngokuita mabhigidha mumushongano waMambo Mwari.

⁶ “Musachumaira” ndizvo izvo zvevanochumaira. “Apana unosisira kuchumaira zviro zvakadaro; zvitsverudzo azvizotinyisi.”

⁷ Izvi zvinosisira kududzwa here, O mhatso yaJakobe? Nyasha dzaMambo Mwari dzafupiswa here? Izvi zviito zvake here? Mazwi angu aaiti zvakanaka here kwaari unohamba ngokururama?

⁸ Asi zuro vanhu vangu vakamiruka kurwisana neni kudai ngegaa: munokhumura jazi pamwepo nechokupfeka chepashi mukunyarara kubva kuneavo vanopinda ndipo mukugonda vasikapinimidzi ngehondo.

⁹ Vakadzi vevanhu vangu munovadzinga kubva mumhatso dzavo dzakanakisa; kubva kuvana vavo vadoko munobvisa uthende hwangu mhera nariini.

¹⁰ Mirukai, muende; ngokuti iyi andiyopi ndau yokuzorora, ngendaa yokusvipiswa kunoparadza ngokuparadza kunotyisa.

¹¹ Kudai munhu aizohambahamba echiereketa manyepo asina shwiro echiti, “Ndinozochumaira kwomuri ngevhini nezvokumwa zvinoradzisa;” ndiye unozoita muchumairi wevanhu ava.

¹² Ngegwinyiso ndinozomuunganidza mweshe pamwepo, O Jakobe, ndinozounganidza veshe vakasara vaIsuraeri; ndinozovaisa pamwepo kudai ngemakwai ari muchibaya, nokudai ngezvifuyo zvemakwai pakati pemafuro awo; vanozoita bope guru ngouwandu hwevanhu.

¹³ Umwe uwo unopwanya unozokwira pamberi pavo; vanozopwanya nokupinda ngepamusiwo, nokubuda ndipo. Mambo wavo unozohamba pamberi pavo, Mambo Mwari echivatungamirira.