Mik. 1 - Bhaibheri Rakachena muChindau

¹ Izwi raMambo Mwari iro rakauya kunaMikha weMoreshethi mumazuva aJothamu, Ahazi, naHezekia, madzimambo aJudha, raakaona ngendaa yeSamaria neJerusarema.

Chiriro ngendaa yeSamaria neJerusarema

² Izwai, imwimwi vanhu mweshe; purutanai, O nyika, nazvo zveshe zvirimwo; Mambo Mwari, Mwari ngaapupure ndimwi.

³ Ngokuti, ringira, Mambo Mwari unobuda kubva kundau yake, naye unozodzaka pashi nokutsikatsika padera pendau dzakakwirira dzenyika.

⁴ Zvino mitunhu inozonyunguruka pashi pake nemapani anozoputika, kudai ngenamo pasinde pomuriro, nokudai ngemvura inodururwa pabiriiri.

⁵ Zveshe izvi indaa yokushaisha kwaJakobe, nezvishaishi zvemhatso yaIsuraeri. Ndaa yaJakobe ngeiri? Andiyo here Samaria? Nendau dzakakwirira dzaJudha ngedziri? Andidzopi Jerusarema here?

⁶ Ndizvo ndinozoita kuti Samaria ridai ngomurwi panyika, pandau panosimwa minda yemivhini.Ndinozodurura pashi mapuwe aro mubani, nokubudisa pamhene madzeyo aro.

⁷ Miedzaniso yaro yeshe yakatsetswa inozopwanyiwa kuita zvigurwa, yeshe mithuso yaro inozopishwa ngomuriro, nayo yeshe miedzaniso yaro yokudira ndinozoiparadza; ngokuita muthuso wouhure rakaiunganidza, nokudai ngomuthuso wouhure inozoshandiswazve.

⁸ Ngeizvi ndinozochema nokuboorera; ndinozoenda ndakakhumurwa magwada ndiri mutitinini; ndinozoita kuchema kwakadai ngekwehava, nokuchema kudai ngemhowani.

⁹ Ngokuti bonje rake arirapiki. Rauya kunaJudha; raguma pamusiwo wevanhu vangu, kuJerusarema.

Magaa Anopinda muJerusarema

¹⁰ Musazvironza muGathi, musachema nepadoodoko; muBhethireafura mburumbukai mubukuta.

¹¹ Pindai henyu munjira yenyu, vagari veShafiri muutitinini nomukutsveruka; vagari veZaanani avauyi pamberi; Bhethiezeri unoboorera naye unozodusa rudetso rwake kubva kweuri.

¹² Ngokuti vagari veMarothi vanonasa kugarira izvo zvakanaka, asi kushata kwadzaka kubva kunaMambo Mwari kuenda pamusiwo weJerusarema.

¹³ Sungai mahachi anohambisa pangoro, vagari veRakhishi; kwaiya kuamba kwokushaisha kumwanasikana Zioni, ngokuti mukati mwako mwakaoneka zvipauko zvaIsuraeri.

¹⁴ Ndizvo unozopa zvipo zvokuvhaisa kuMoreshethigathi; mhatso dzaAkhizibhi dzinoita dzokuchengedzera kumadzimambo aIsuraeri.

¹⁵ Ndinozounzazve munyisi padera penyu, vagari veMaresha; uthende hwaIsuraeri hunozouya kuAdhuramu.

¹⁶ Dziite mhanza, upare bvudzi rako ngendaa yevana vako vanodikanwa; udziise mhanza kudai ngengwanga, ngokuti vakatorwa kubva kweuri kuitwa hloko.