Mazwi 9 - Bhaibheri Rakachena muChindau

Ungwaru noUpenzi

¹ Ungwaru hwaaka mhatso yahwo, hwatsetsa sika dzahwo nomwe.

² Hwauraya mhuka dzahwo; hwakumanidza vhini rahwo; hwanasirira tafura rahwo.

³ Hwatuma varandasikana vahwo, hunodaidzira pandau dzakapindisisa kukwira dzedhorobha.

⁴ “Uwo usina chaanozia, ngaapaukiremuno!” Kwaari uwo usina kuzwisisa hunoti,

⁵ “Uya, udye chingwa changu, umwe vhini rendakakumanidza.

⁶ Siya upenzi, upone; uhambe munjira yokuzwisisa.”

⁷ Kunyazwi ndiani unokaraidza mudadi, unoona kutsverudzwa; nouwo unorambidza munhu wakashata unokuwadzwa.

⁸ Usarambidza mudadi unozokuzonda; wakangwara, apo arambidzwa, unozokuda.

⁹ Dzidzisa munhu wakangwara, naye unozopinda kungwara; dzidzisa wakarurama, naye unozouyirwa ngokudzidza.

¹⁰ Kutya Mambo Mwari ndikwo kuamba kwoungwaru, nokuzia kwoWakachena kuzwisisa.

¹¹ Ngokuti kubudikidza ndini mazuva ako anozowanzwa, nemakore okupona kwako anozotutsirwa.

¹² Kuti wakangwara, unodzingwarira iwewe pachako; kuti wechidada, unozokutwara wega.

¹³ Dzimai benzi rinobwaza; ibenzi, arizii chiro.

¹⁴ Rinogara pamusiwo wemhatso yaro, pachigaro chepandau yakakwirira yomudhorobha,

¹⁵ kudaidzira kuneavo vanopinda ndipo, vahambi vari munjira dzavo,

¹⁶ “Kunyazwi ndiani usina ungwaru, ngaapindemuno!” Nokwaari usina kuzwisisa, unoti,

¹⁷ “Mvura yabiwa inotapira, nechingwa chinodyiwa mukufishika chinonaka.”

¹⁸ Asi aazii kuti vakafa variyo, nevaeni vake vari muudzamu hweSheori.