Mazwi 7 - Bhaibheri Rakachena muChindau

¹ Mwana wangu, ngwarira mazwi angu, ufishe mipango yangu mweuri

² Ngwarira mipango yangu, upone; ungwarire kudzidzisa kwangu kudai ngemboni yedziso rako;

³ zvisungire pazvikunwe zvako, zvinyore parusamba rwomwoyo wako.

⁴ Ronza kuungwaru kuti, “Iwewe uri hanzvadzi yangu,” nokudaidza kuzwisisa kuti, “Iwewe uri mungani wangu wepamwoyo;”

⁵ kuti zvikungwarire kubva kunomukadzi uri mhombo nemazwi ake akaserera.

Mukadzi Mhombo

⁶ Ngokuti ngepafasitera remhatso yangu ndakaringira kubanze ngepadimba rangu,

⁷ neni ndakaona pakati pevasina kungwara, ndikaringisisa pakati pevatsva, jaha risina kuzwisisa,

⁸ rechipinda ngenjira pasinde pekhona pake, echitora njira inoenda kumhatso yomukadziwo

⁹ kwasvipa, madeekoni, mukuwo wousiku nechidima.

¹⁰ Zvino mukadzi unouya kwaari akadzinemesa kudai ngemhombo, anomwoyo unochengedzera.

¹¹ Unodaidzira, echiita kudai ngezvaanoda; tsoka dzake adzigari mumhatso yake;

¹² zvino uri mumapato, nguva imweni uri pamusika, unogarira mumakhona eshe.

¹³ Ndizvo unomumbundira nokumuchingamidza ngomuromo, anehope isikatsveruki, unoti kwaari,

¹⁴ “Ndinosisira kupira midiro, nyamashi ndaripa mhiko dzangu.

¹⁵ Ndizvo zvino ndabuda kooshongana newe, kukutsvakisisa, nazvino ndakuona!

¹⁶ Ndanemesa mubhedhi wangu ngezvokufukidza ndizvo, zvakarukwa ngorukangaza rweEgipite zvinemaara.

¹⁷ Ndafafaza mubhedhi wangu ngemitombo inonuhwira yemura, makha, khinamoni.

¹⁸ Uya, ngatigutiswe ngorudo metsa kuedze; ngatidakare pachedu murudo.

¹⁹ Ngokuti mwamuna wangu akuna kanyi, wahamba rwendo kuenda kuretu.

²⁰ Watora chikwama chemare kuenda nacho, unozouya kanyi mukutawa kwomwedzi.”

²¹ Ngemazwi ake mazhinji akanaka, unomunyengerera kuti atende; ngokuserera kwokuereketa kwake unomuangiridza.

²² Ngokukasira unoteera sure kwake, kudai ngekabi inoenda koourawa, nokudai ngebenzi rinoenda koororwa mumanguri

²³ metsa musee ubaye mumatumbu ake, kudai ngeshiri inokasira kuenda kumurau, isikazii kuti zvinoronza kupona kwayo.

²⁴ Nazvino, vana vangu, ndizwei imwimwi, mupurutane mazwi omuromo wangu.

²⁵ Usatendera mwoyo wako kunjira dzake; musarashikiswa ngenjira dzake.

²⁶ Ngokuti vazhinji ndivo avo vaaradzikidza pashi, nevazhinji vakaurawa ndiye.

²⁷ Mhatso yake injira inodzaka kuenda Sheori, mumakamera orufu.