Mazwi 6 - Bhaibheri Rakachena muChindau

Kungwadzwa Kumweni

¹ Mwana wangu, kuti wagondisa muakirwana wako, kuti wadzisungira kunoumweni,

² wateiwa ngokuereketa kwemiromo yako, wabatwa ngemazwi omuromo wako.

³ Ndizvo ita ichi, mwana wangu, udziponese pachako ngokuti wawira munyara yomuakirwana wako; enda, udzipfaise, nokupota muakirwana wako.

⁴ Usaata hope netsiyo dzako dzisakutsira;

⁵ dziponese kudai ngenondo inotiza kubva munyara yomuvhimi, kudai ngeshiri inotiza kubva munyara yomutei.

⁶ Enda kudzunzi, iwewe unenungo; wechikarakadza njira dzaro, ungware.

⁷ Iro risina mambo, mutungamiriri, nokuti mutongi,

⁸ rinonasirira kudya kwaro muzienza, rechiunganidza kudya kwaro ngenguva yokukukura.

⁹ Unozoata apo mukuwo wakadini, iwewe zinyanungo? Unozomuka riini muhope dzako?

¹⁰ Kuata padoko, nokukutsira kudoko, nokupeta kudoko mioko mukuzorora,

¹¹ nourombo hunozouya kudai ngembavha, nokutama kwako kudai ngomunhu unezvokurwa.

¹² Munhu usina shwiro unoshaisha, unohamba nomuromo unopaukisa.

¹³ Unochonya ngemadziso ake, unoereketa ngetsoka dzake, echikhomba ngezvinwe zvake;

¹⁴ nomwoyo wakashata, unoronga kushata; unoangira kusima hasha.

¹⁵ Pane uwo wakadaro kushata kunozouya ngokukasira; ngokukasira unozogurwa pasina chinodetsera.

¹⁶ Panezviro zvitanhatu zvinozondwa ndiMambo Mwari, zvinomwe zviri chinyangadzo kwaari:

¹⁷ madziso ounodzikudza, rurumi runonyepa, nyara dzinoparadza ngazi isina ndaa,

¹⁸ mwoyo unoronga mazano akashata, tsoka dzinokasa kurumba mukushaisha,

¹⁹ chapupu chokunyepa chinoereketa manyepo, nouwozve unokusha hasha pakati pemhuri.

Kungwadzwa ngendaa yoKuomba

²⁰ Mwana wangu, ngwarira mipango yababa ako, usasiya kudzidzisa kwamai ako.

²¹ Zvisungire pamwoyo wako mukuwo weshe, zvisungire pamutsipa wako.

²² Apo woohamba, zvinozokutungamirira; apo wooata, zvinozokungwarira; naapo woomuka, zvinozoereketa newe.

²³ Ngokuti mupango chibani, nokudzidziswa kujeka; kurambidzwa kwokupangwa injira yokupona,

²⁴ kukungwarira kubva kunomukadzi wakashata, kubva kururumi rwakaserera rwemhombo.

²⁵ Usaemura unaku hwake mumwoyo mwako; usatenda kuti iye akuemudze ngokuringira kwemadziso ake;

²⁶ ngokuti mubhadharo womukadzi unoomba, mutengo wechingwa, asi mukadzi woumweni unotsvaka kupona kwemwamuna kwemene.

²⁷ Munhu ungakona kufungatira muriro paditi, usikapishi zvokufuka zvake here?

²⁸ Nokuti umwe ungahamba padera pemasimbe anopisha, tsoka dzake dzisikatsvi here?

²⁹ Ndizvo zvinoita uwo unoenda kumukadzi womuakirwana wake; nouwo unomugwama aazoiti usina ndaa.

³⁰ Vanhu avashoori mbavha, kuti yechiba kuti idye apo yoofa ngenzara.

³¹ Asi kuti ikabatwa, inozohwirinzira kanomwe; inozopa pfuma yeshe yemhatso yayo.

³² Asi iye unoomba nomukadzi aana kuzia; iye unoita kudaro unodziparadza pachake.

³³ Unozoane zvironda nokushoorwa; nokutsveruka kwake akuzoduswi.

³⁴ Ngokuti ndurumwa inomusa ushungu hwemwamuna; ndizvo aazokunguriri ngezuva rokuunzidza.

³⁵ Aazotendi kuashira muripo, nokuti kufumhwa muromo, kunyazwi ngezvipo zvakawanda.