Mazwi 5 - Bhaibheri Rakachena muChindau

Kungwadzwa ngendaa yoUmhombo

¹ Mwana wangu, purutana kuungwaru hwangu, kotamisa nzee dzako kunokuzwisisa kwangu,

² kuti ubatirire kungwara, nemiromo yako ingwarire kuzia.

³ Ngokuti miromo yomukadzi uri mhombo inobomha uchi, nokuereketa kwake kwakaserera kupinda mafuta;

⁴ asi magumo ake anovava kudai ngomukhondo, echipinza kudai ngeshoti inoupanga huiri.

⁵ Tsoka dzake dzinodzaka mukufa; nezvitsiko zvake zvinoenda muSheori.

⁶ Aangwariri njira yakarurama yokupona; njira dzake dzinopauka, naye asikadzizii.

⁷ Zvino, mwana wangu, purutana kwendiri, usasiya mazwi omuromo wangu.

⁸ Ngwarira njira yako kuretu kubva kwaari, usaenda pasinde pomusiwo wemhatso yake;

⁹ nokuti ungazopa kuremeredzwa kwako kunevamweni, nemakore ako kunevasina nyasha,

¹⁰ nevapara vanozotora chikoaniswa choupfumi hwako; nemishando yako inozoenda mumhatso yomupara,

¹¹ nepamagumo okupona kwako unozogwimba, apo nyama yako nomuiri wako zvapedzwa;

¹² newe wechiti, “Kuzondanyi kwendakaita kupangwa, nomwoyo wangu wakashoora kupangwa.

¹³ Andizi kupurutana izwi ravadzidzisi vangu, nokuti kukotamisa nzee dzangu kuvapangi vangu.

¹⁴ Zvino ndaguma pandau pokuparadzwa kweshe pakati pechiunga chakaungana.”

¹⁵ Imwa mvura yechinyuka chako, mvura inoerera kubva muchinyuka chako.

¹⁶ Zvinyuka zvako zvinosisira kupararira kweshe here, ndwizi dzemvura mumapato?

¹⁷ Ngazviite zvako iwewe wega, haiwa kukowana nevapara.

¹⁸ Chinyuka chako ngachifumiswe, wechidakara ngomukadzi woutsva hwako,

¹⁹ hadzi yenondo yakanaka, hadzi inenyasha. Mazamu ake ngaakugutise mikuwo yeshe, ugare wechidhakwa ngorudo rwake.

²⁰ Ngenyi wechidhakwa, mukororo wangu, ngomukadzi umweni nokumbundira diti romukadzi uri mhombo?

²¹ Ngokuti njira dzomunhu dziri pashi pemadziso aMambo Mwari, nenjira dzake dzeshe dzinoringisiswa ndiye.

²² Zvishaishi zvewakashata zvinozomubata, naye unozobatwa ngezvisungo zvokushaisha kwake.

²³ Unozofa ngokukorera kudzibata; ngendaa youpenzi hwake hwakakura unozorashika.