Mazwi 4 - Bhaibheri Rakachena muChindau

Kuuyirwa Kuri muUngwaru

¹ Purutanai, imwimwi vana, kupanga kwababa, nasai kuzwisisa, kuti muzie ungwaru;

² ngokuti ndinomupa kupanga kwakanaka; musaramba kudzidzisa kwangu.

³ Naapo ndaiya murumbwana mudoko wababa angu, chiya nowaidikanwa ndimai angu,

⁴ wakandidzidzisa, akati kwendiri, “Mwoyo wako ngaubatisise mazwi angu; ngwarira mipango yangu, newe upone.

⁵ Tsvaka kungwara, tsvaka kuzwisisa; usariyarwa nokuti kukunukuka kubva kumazwi omuromo wangu.

⁶ Usakusiya, nakwo kunozokungwarira; kude, nakwo kunozokurinda.

⁷ Kuamba kwoungwaru ndikwo uku: Tora ungwaru, kunyazwi ngechirizve chounozotora, tora kuzwisisa.

⁸ Hukudze, nahwo hunozokukudza; hunozokuremeredza kuti ukahumbundira.

⁹ Hunozoisa chinemeso chounaku musoro rako; hunozoisa padera pako dzungudza rakanaka.”

¹⁰ Izwa, iwewe mwana wangu, newe uashire mazwi angu, kuti makore okupona kwako awande.

¹¹ Ndakudzidzisa njira youngwaru, ndakutungamirira munjira dzakarurama.

¹² Naapo wechihamba, tsoka yako aizopiyiwi; kudai wechirumba, auzopumhunwi.

¹³ Batisisa kupangwa; usakurekera; kungwarire, ngokuti ndikwo kupona kwako.

¹⁴ Usapinda munjira yevakashata, usahamba munjira yevaiti vezvakashata.

¹⁵ Irekere, usahamba ndiyo; ibva kweiri, upinde mberi.

¹⁶ Ngokuti avaati vasati vaita chakashata, nehope dzavo dzinoti ngarwi kuti vasati vaita kuti umwe awe.

¹⁷ Ngokuti vanodya chingwa chokushata, vechimwa vhini rokupamba.

¹⁸ Asi njira yavakarurama yakadai ngokujeka kwemambakwedza; kunoramba kwechitutsira kujeka metsa zuva rakaperera.

¹⁹ Njira yevakashata yakadai ngechidima chakadzama; avazii kuti vanopumhunenyi.

²⁰ Mwana wangu, purutana mazwi angu; ukotamise nzee dzako kumazwi angu.

²¹ Usatenda kuti abve mukuona kwako; uangwarire mukati mwemwoyo wako.

²² Ngokuti ari kupona kuneavo vanoaona, nokuponeswa kunyama yavo yeshe.

²³ Ngwarira yaamho mwoyo wako, ngokuti kwouri kunobuda zvinyuka zvokupona.

²⁴ Dusa kubva kwouri kuereketa kusikazi kururama, nokuereketa kwakashata kuduse kwouri.

²⁵ Madziso ako ngaaringire mberi, nokuringira kwako kururame pamberi pako.

²⁶ Ruramisa njira yetsoka dzako, nenjira dzako dzeshe dzinozoita dzegwinyiso.

²⁷ Usakunukukira kumudyo nokuti kumuoshwe; dusa tsoka dzako kubva mukushata.