Mazwi 30 - Bhaibheri Rakachena muChindau

Mazwi aAguri

¹ Mazwi aAguri mukororo waJake, kunoti kuprofeta. Ndizvo zvinoronza munhu kunaIthieri, eya, kunaIthieri naUkhari:

² “Ngegwinyiso ndakadai ngemhuka kupinda vanhu veshe; andina kuzwisisa kwomunhu.

³ Andizi kudzidza ungwaru, zve, andina kuzia kwoUwo Wakachena.

⁴ Ndiani wakakwira mudenga, nokuti kudzaka kubveyo? Ndiani wakaunganidza mhepo pakati penyara? Ndiani wakaputira mvura mujira? Ndiani wakaemesa magumo eshe enyika? Ndiani zina rake, nezina remwana wake? Ngegwinyiso unozia!

⁵ “Izwi reshe raMwari igwinyiso; ndiye chihlangu kwevari veshe vanohwara mwaari.

⁶ Usatutsira kumazwi ake, kuti asakukaraidza, newe uoneke uri munyepi.”

Mazwi Amweni Akangwara

⁷ “Zviro zviiri zvendinokukumbira; usandirambira nazvo ndisati ndafa:

⁸ Bvisira kuretu kubva kwendiri zvisina shwiro nokunyepa; usandipa urombo, nokuti upfumi; ndigutise ngokudya kwakandikwanira,

⁹ nokuti ndigutiswe ndikurambe, ndironze kuti, ‘Ndiani Mambo Mwari?’ Nokuti ndinozoita murombo, nokuba, ndishandise zina raMwari wangu ngenjira isina shwiro.

¹⁰ “Usamangara muranda kunatenzi wake, nokuti muranda unozokutuka, newe uoneke unendaa.

¹¹ “Varipo avo vanotuka madzibaba avo, vasikafumisi vanamai vavo.

¹² Varipo avo vanodziona vakacheneswa mukuona kwemadziso avo, asi avazi kusukwa kubva kutsvina yavo.

¹³ Varipo avo, A kudzikudza kwakaitawani madziso avo! Kurebanyi kwakaita tsiyo dzavo!

¹⁴ Varipo avo mazino avo akadai ngeshoti, nemadungambwa avo akadai ngemapanga, kuuraya varombo kubva panyika, vatami kubva pakati pevanhu.

¹⁵ “Chiamwa-ngazi chaiya nevanasikana vairi, vaidaidzira vechiti, ‘Tipei tipei.’ Zviripo zviro zvitatu zvisingagutiswi, zvirongomuna zvisingamboronzi kuti, ‘Zvakwana’:

¹⁶ Sheori, ndani isikabereki, nyika isikaperi nyota yemvura, nomuriro, usikazomboronzi kuti, ‘Zvakwana.’

¹⁷ “Dziso rinotsvinyira baba, nokushoora kupurutana mai, makungu omubani anozoritsoura, nokudyiwa ngemakodzi.

¹⁸ “Zviro zvitatu zvinonyanya kundishamisa, zvirongomuna zvendisikazwisisi:

¹⁹ Njira yegodzi mudenga, njira yenyoka padera peruware, njira yengarava pakati poruandhle, nenjira yemwamuna nemhandwe.

²⁰ “Iyi ndiyo njira yomukadzi unoomba: unodya, nokupukuta muromo wake echiti, ‘Andizi kushaisha.’

²¹ “Pashi pezviro zvitatu nyika inohuta, pashi pezvirongomuna inozvinyenya:

²² Hloko apo inotonga, benzi apo ragutiswa ngokudya,

²³ mukadzi usikadiwi apo aroorwa, nomurandakadzi apo anogara nhaka yomurongo wamambo wake.

²⁴ “Zviripo zviro zvirongomuna padera penyika zvakatsonga, asi zvakangwara kakurutu:

²⁵ Matsunzi vanhu vasikazi kugwinya, asi anounganidza kudya kwawo ngomukuwo wezienza;

²⁶ mbira imhuka dzisikazi kugwinya, asi dzinonasira ugaro hwadzo mumapuwe;

²⁷ ndongwe adzina mambo, asi dzinohamba zvakanaka mumitanda;

²⁸ dandemutande ungaribata munyara, asi rinooneka mungome dzemadzimambo.

²⁹ “Zviripo zviro zvitatu zvinohamba ngenjira kwayo, zvirongomuna zvinohamba zvakanaka:

³⁰ Mhondoro iyo yakagwinya pakati pezvikara zveshe zvomushango, aifuratiri imweni,

³¹ kuhamba kwejongwe, gotokoto, namambo pamberi pehondo yake.

³² “Kuti waita ngoupenzi mukudzikudza, nokuti kudai waironga zvakashata, isa nyara yako pamuromo wako.

³³ Ngokuti kukurungwa kwomukaka kunobudisa mafuta, nokushongororwa kwemiro kunobudisa ngazi; ndizvo kuangiridzwa kwoushungu kunobudisa hasha.”