Mazwi 3 - Bhaibheri Rakachena muChindau

Kupangwa kweVatsva

¹ Mwana wangu, usariyarwa kudzidzisa kwangu, asi mwoyo wako ngaungwarire mipango yangu;

² ngokuti inotutsira kuwanda kwamazuva, nendaramo yakareba, nokugarisika.

³ Usatenda kuti rudo negwinyiso zvikusiye; zvisungire pamutsipa wako, zvinyore parusamba rwemwoyo wako.

⁴ Ndizvo unozoona kudiwa nokuzwisisa kwakwo mukuona kwaMwari nevanhu.

⁵ Gonda munaMambo Mwari ngomwoyo wako weshe, usikatseyami muungwaru hwako.

⁶ Munjira dzako dzeshe mutende, naye unozoruramisa njira dzako.

⁷ Usaita wakangwara mukuona kwako, itya Mambo Mwari, usiye zvakashata.

⁸ Zvinozoita mutombo kumuiri wako, zvinozoita kumusirirwa kwomuiri wako.

⁹ Remeredza Mambo Mwari ngoupfumi hwako, mitanguro yemichero yako yeshe;

¹⁰ zvino matura ako anozozariswa ngezvakawanda, nezvokukamurira vhini zvako zvinozopopoma ngevhini idzva.

¹¹ Mwana wangu, usashoora kuorora kwaMambo Mwari nokuti kupera simba ngendaa yokukaraidza kwake,

¹² ngokuti uwo waanoda Mambo Mwari, unomukaraidza kudai ndibaba kunomwana waanodakara ndiye.

¹³ Unomuchena uwo munhu unoona ungwaru, nomunhu unoona kuzwisisa,

¹⁴ ngokuti muthuso wake unopinda sirivha, nokuuyirwa kwake kwakapinda mukore wakaeriswa.

¹⁵ Unomutengo mukuru kupinda mapuwe erubhi, nezviro zveshe zvoungada azvingaedzaniswi naye.

¹⁶ Kupona kwemazuva akawanda kuri munyara yake yokumudyo; munyara yake yokumuoshwe mune upfumi nokuremeredzwa.

¹⁷ Njira dzake injira dzokudakadzwa, nenjira dzake dzeshe ngedzokunyarara.

¹⁸ Ndiwo muti wokupona kuneavo vanobatirira kwouri; vanozwi vanomuchena veshe vanoramba vakabatirana kwouri.

¹⁹ Ngoungwaru Mambo Mwari wakasika nyika; ngokuzwisisa wakaemesa matenga.

²⁰ Ngokuzia kwake wakabeura zvinyuka zvoruandhle zvinoerera, nemakore anodonhesa beto.

²¹ Mwana wangu, usatendera kuti izvi zvibve mukuona kwako. Ngwarira ungwaru nokuzia.

²² Ndizvo zvinozoita kupona kumweya wako, nounaku kumutsipa wako.

²³ Zvino unozohamba munjira yako ngokungwaririka, netsoka dzako adzizopumhunwi.

²⁴ Apo wooata pashi, auzotyi apo pounoata pashi, hope dzako dzinozonaka.

²⁵ Usatya kukarudzwa kunouya ngokukasira, nokuti ngokuchakatwa kwevakashata apo kwauya;

²⁶ ngokuti Mambo Mwari unozoita gonda rako, unozongwarira tsoka dzako kuti dzisabatwa.

²⁷ Usanyima zvakanaka kuneavo vanozvisisira, apo simba rokuzviita riri munyara yako.

²⁸ Usati kunomuakirwana wako, “Enda, uuyezve, mangwani ndinozokupa,” apo utori nacho.

²⁹ Usaronga zvakashata kunomuakirwana wako, uwo unogarisana newe ngokugondeka.

³⁰ Usaita hasha nomunhu pasina ndaa, apo pasina chakashata chaitwa kweuri.

³¹ Usaane ndurumwa nomunhu dzongoni, usatsanangura naimwe yenjira dzake;

³² ngokuti uwo unopaukisa uri chinyangadzo kunaMambo Mwari, asi wakarurama uri mukugonda kwake.

³³ Chituko chaMambo Mwari chiri mumhatso yevakashata, asi unofumisa ugaro hwevakarurama.

³⁴ Unoshoora avo vanoshoora, asi unoitira nyasha vakapfaa.

³⁵ Vakangwara vanozogara nhaka yokukudzwa, asi mapenzi asikazwi kutsverudzwa.