Mazwi 28 - Bhaibheri Rakachena muChindau

¹ Wakashata unotiza pasina wamurumbirira, asi vakarurama vanoshinga kudai ngemhondoro.

² Naapo nyika yaane kumukira, yaane vatongi vazhinji; asi inomutongi wakangwara, inogara mukunyarara mhera nariini.

³ Munhu mutongi unotambudza varombo wakadai ngemvura inokukuzva isikasiyi zvokudya.

⁴ Avo vanosiya mupango vanokudza vakashata, asi avo vanongwarira mupango vanorwisana navo.

⁵ Vanhu vakashata avazwisisi kutonga kwakanaka, asi avo vanotsvaka Mambo Mwari vanokuzwisisa kweshe.

⁶ Kwakapinda kunaka kuita murombo nokuhamba mukururama pane kuita mupfumi unopauka munjira dzake.

⁷ Uwo unongwarira mupango mwana wakangwara, asi uwo unoshamwaridzana nevanhu vanokara unotsverudza baba ake.

⁸ Uwo unowanza upfumi ngemare yokunyepera, nokuwanza ngenjira yakashata unozohuunganidzira uwo unoitira nyasha varombo.

⁹ Kudai umwe echifuratira nzee yake kuti asazwa mupango, nomukumbiro wake unoita chinyangadzo.

¹⁰ Uwo unoita kuti vakarurama vapauke kuenda munjira yakashata, unozowira muhunza yake yaakadziitira, asi vakarurama vanozogara nhaka yezvakanaka.

¹¹ Mupfumi wakangwara mukuona kwake, asi murombo wakangwara unomuona nemukati

¹² Apo vanhu vakarurama vechinyisa, huripo uthende hwakakura, asi apo vakashata vechiita simba, vanhu vanodzifisha.

¹³ Uwo unofisha zvishaishi zvake aazobudiriri, asi uwo unozvitenda nokuzvisiya unozoona nyasha.

¹⁴ Unomuchena munhu uwo unotya mukuwo weshe, asi uwo unokonzesa mwoyo wake unozowira mukushata.

¹⁵ Kudai ngemhondoro inorira nebheya rinokhura, ndizvo zvinoita mutongi wakashata padera pevarombo.

¹⁶ Mutongi unotama kuzwisisa mutambudzi mukuru; asi uwo unonyenya kuuyirwa ngenjira yakashata unozowanza mazuva ake.

¹⁷ Kudai munhu echidzimbirwa ngengazi yomunhu umweni, muurayi ngaagare echizungaira metsa afe, pasina naumwe unomudetsera.

¹⁸ Uwo unohamba mukururama unozoponeswa; asi uwo unoteera njira dzakashongoroka unozowira muhunza.

¹⁹ Weshe unorima munda wake unozoona kudya kwakawanda, asi iye unoteera zvisina shwiro unozoita murombo mukurutu.

²⁰ Munhu unogondeka unozoona zvifumiso zvakawanda, asi iye unokasira kuita mupfumi aazoiti usina ndaa.

²¹ Kuita mukheto akuzi kunaka, asi chigurwa chechingwa chingaita kuti munhu ashaishe.

²² Mukari unokasira kuti aone upfumi, aapinimidzi kuti urombo hunozomugumira.

²³ Uwo unokaraidza unozoona kudikanwa ngesure, kupinda uwo unosereresa ngorurumi rwake.

²⁴ Uwo unobira baba ake nokuti mai ake echiti, “Achisiri chishaishi,” ngeumwe wevaurayi.

²⁵ Munhu unokara unomusa hasha, asi kunyazwi ndiani unoisa kugonda kwake munaMambo Mwari unozoitwa mupfumi.

²⁶ Uwo unogonda mwoyo wake ibenzi, asi uwo unohamba ngokungwara wakangwaririka.

²⁷ Kunyazwi ndiani unopa varombo aazotami, asi uwo unokonya madziso ake unozoashira kutukwa kwakawanda.

²⁸ Apo vakashata vechiita simba, vanhu vanodzifisha; asi apo vechiparara, vakarurama vanowanda.