Mazwi 27 - Bhaibheri Rakachena muChindau

¹ Usadziganzisa ndimangwani ngokuti auzii kuti kunozoitikenyi ngezuvaro.

² Munhu umweni ngaakukudze, haiwa muromo wako; mupara, haiwa miromo yako.

³ Buwe rinorema, nejecha rinorema, asi ushungu hwebenzi hunorema kupinda zveshe.

⁴ Ushungu hunoremadza nokunyangadzwa kwakanyanya kushata, asi ndiani ungakona kuema pamberi pendurumwa?

⁵ Kurambidza kuri pamhene kwakapinda kunaka kunorudo rwakafishika.

⁶ Kuremadza kweshamwari kunogondeka; asi kuchingamidza kwemiromo yegaa kunowanda.

⁷ Munhu wakaguta unoshoora misoro yeuchi, asi unenzara zveshe zvinovava zvinotapira.

⁸ Kudai ngeshiri inopepesheka kubva pachisaki chayo, ndizvo zvinoita munhu unopepesheka kubva pandau yake.

⁹ Mafuta nomutombo unegwema rakanaka zvinodakadza mwoyo; ndizvo zvinoita kudakadza kwoushamwari hwomunhu kunopinda kunaka kunokudzipanga pachako.

¹⁰ Usasiya shamwari yako neshamwari yababa ako; usaenda mumhatso yehama yako ngezuva repfumvu yako. Muakirwana uri pasinde wakanaka kupinda hama iri kuretu.

¹¹ Ngwara, mwana wangu, ita kuti mwoyo wangu udakare, kuti ndikone kupingura kunyazwi ndiani unondishoora.

¹² Munhu wakangwara aona zvakashata unodzifisha; asi avo vasina chevanozia vanoenda mberi nokupinda mudambudziko razvo.

¹³ Tora chokufuka chouwo wadzipira kuita chibatiso kumupara; utore chibatiso chomukadzi mupara.

¹⁴ Uwo unofumisa muakirwana wake ngeizwi guru, echimuka mumambakwedza, kunozoerengerwa kuita chituko.

¹⁵ Kudonha kunoangirira ngezuva rokunaya zvinoedzana nomukadzi unehasha,

¹⁶ kumurambidza kwakadai ngokurambidza dutu, nokuti kubata mafuta munyara yake yokumudyo.

¹⁷ Simbi inorodzera simbi; ndizvo munhu unorodzera hope youmweni wake.

¹⁸ Uwo unongwarira muonde ndiye unozodya michero yawo; nouwo unongwarira mambo wake unozoremeredzwa.

¹⁹ Kudai ngomumvura hope inoringirana nehope, ndizvo mwoyo womunhu unoringirana nomunhu.

²⁰ Sheori neAbhadhoni azvigutiswi, nemadziso omunhu aagutiswi.

²¹ Hari ngeyokunyungurusa sirivha nechoto ngechokunyungurusa mukore, ndizvo nomunhu unoziikanwa ngokukudzwa kwaanoitwa.

²² Kunyazwi ungatwa benzi nekoroni muduri ngomutwo, asi upenzi hwaro ahuzobudi.

²³ Nasa kuzia kugara kwezvifuyo zvako, nokunasa kuona kugara kwemakwai nen'ombe dzako;

²⁴ ngokuti upfumi haugari mhera nariini, nokuti dzungudza arigariri mibarirwana yeshe.

²⁵ Naapo mwenje wapera, nomwenje muishi unokura, nemiriwo yemitunhu inounganidzwa,

²⁶ zvimakwai zvinounza zvokufuka zvako, nembudzi mutengo womunda;

²⁷ unozoapo mukaka wakakwana wembudzi, kuita kudya kwemhatso yako nokwendaramo yevarandakadzi vako.